Coremain nomea a Tito Barreiro director de Desenvolvemento de Negocio Global

A empresa Coremain, con sede en Santiago, vén de informar que xa conta cun departamento novo de seu, máis polo miúdo a súa Dirección de Desenvolvemento de Negocio Global, que unifica a área comercial da compañía. A nova Dirección estará baixo as rendas dun dos directivos de Coremain, Tito Barreiro, que dende hai cinco anos viña ostentando o carto de director comercial para a zona norte. Con este nomeamento, engade a empresa, preténdese homoxeneizar baixo unha única área territorial toda a oferta comercial, potenciando a orientación a sectores e unha estratexia de venda enfocada tanto a servizos como a produto.
A decisión enmárcase no proceso de evolución de Coremain que en boa medida comezou a principios deste ano trala incorporación de Luis Álvarez Sestelo ao cargo de director xeral e tralo artellamento das liñas xerais da nova estrutura organizativa da firma, “máis adaptadas ás esixencias dos mercados actuais”.
Tito Barreiro, vigués de 39 anos, é licenciado en Administración e Dirección de Empresas pola Facultade de Económicas e Empresariais de Vigo e posúe unha dilatada experiencia no sector das novas tecnoloxías, ao que leva vencellado máis de dez anos, durante os cales desenvolveu a súa carreira profesional sempre en postos de responsabilidade na área de vendas.