Coremain lánzase a formar en blockchain
venres, 21 de decembro do 2018
A
empresa Coremain está a pechar o ano cunha actividade formativa
sobre as tecnoloxías que van mudar (converténdoo en máis seguro,
eficaz e eficiente) o xeito de xestionar, compartir e información
entre empresas e empresas, entre empresas e clientes ou entre
administracións e cidadáns. Estamos a falar das tecnoloxías
blockchain, cadea de bloques. A
actividade formativa ten prevista unha duración dun total de 40
horas e está concibida para achegar coñecemento, prácticas e
adestramento a un total de 15 empregados. Juan González,
responsábel de seguridade e privacidade do Centro Tecnolóxico
Gradiant, será a persoa encargada da formación.
Segundo
informa Coremain, trátase dunha “formación moi completa”, que
contou co apoio de IGAPE e Fondo Social Europeo e coa que o equipo de
Coremain poderá profundar en todos os aspectos relevantes do eido
blockchain de face á súa aplicación nos proxectos da
compañía compostelá: dende os aspectos máis básicos (cifrado,
criptomoedas, nodos P2P, transaccións, seguridade) até o
desenvolvemento de aplicacións descentralizadas e as conexións con
tecnoloxía IoT (Internet of Things), ademais da súa
aplicación en diferentes sectores como a banca dixital (fintech),
a saúde dixital (a eSaúde) ou no desenvolvemento de
proxectos colaborativos.
Na
segunda parte da formación abordarase o desenvolvemento de software
(API, librarías, pasarelas de pago, etc.) e afondarase nas
características e a administración do blockchain Ethereum,
amais de traballar con diferentes ferramentas e desenvolver
aplicacións concretas co “obxectivo de pór en práctica os
coñecementos teóricos adquiridos”.