Coremain e Sermicro ceiban os servizos de TV no HULA de Lugo

martes, 24 de marzo do 2020 Redacción

A alianza empresarial Coremain-Sermicro decidiu ceibar, ante a necesidade de favorecer o lecer e o benestar das persoas ingresadas por mor da pandemia de COVID-19 no Hospital Universitario Lucus Augusti (HULA) de Lugo, os servizos de entretemento de televisión situados a pé de cama na zona de hospitalización do dito centro, onde Coremain e Sermicro dan servizo. O obxectivo é que os pacientes ingresados e illados, sen posibilidade de recibir visitas, poidan gozar, durante o estado de alarma decretado polo Goberno, de acceso gratuíto a estes servizos.
A medida ten a súa orixe na situación de emerxencia sanitaria provocada pola evolución da epidemia do coronavirus, que obriga aos pacientes a ficar recluídos na súa habitación sen posibilidade de recibir visitas de familiares ou amigos, ou de adquirir os correspondentes cartóns de televisión. “Grazas a esta medida, poderán gozar dos servizos de TV a pé de cama sen contraprestación, e até o final do estado de alarma” explica Coremain, engadindo que este tipo de cobertura achégase a través da súa UTE con Sermicro dende o 14 de outubro de 2010.

PUBLICIDADE