Confírmase un Castlevania desenvolvido en España para a Nintendo 3DS

A feira E3 serviu para que finalmente sexa presentado oficialmente o moi rumoreado xogo Castlevania: Lords of Shadow – Mirror of Fate, que chegará no outono en exclusiva para a Nintendo 3DS e que está a ser desenvolvido polo estudo español Mercury Steam, que tamén traballa no Castlevania: Lords of Shadow 2 para Xbox 360 e PlayStation 3.
O xogo desvela a historia dos descendentes de Gabriel Belmont, Simon e Trevor Belmont, que loitarán contra o seu propio destino co obxectivo de coñecer a verdade. Trevor Belmont, un cabaleiro da Irmandade da Luz, prepárase para vingar a morte da súa nai a mans do seu pai, quen regresou tras anos de exilio para establecer a súa residencia nun misterioso castelo. Agora Gabriel Belmont é o poderoso vampiro Drácula, e declarou a guerra á Irmandade encamiñada a un catastrófico enfrontamento entre pai e fillo.
En Mirror of Fate os usuarios poderán manexar múltiples personaxes, cada un cas súas particularidades, contando con grande cantidade de combos e elaborados sistemas estratéxicos de combate. O xogo, pese a facer uso dos gráficos 3D da portátil de Nintendo, terá unha mecánica de desprazamento lateral, o que agradecerán os seareiros desta mecánica coñecida popularmente como Metroidvania (por ser a empregada por numerosos títulos das franquías de Metroid e Castlevania) e que foi adoptada masivamente polas entregas desta saga para consolas portátiles.

Vídeo de presentación do xogo de Mercury Steam para Nintendo 3DS