Confirman que Sony lanzará unha PS4 de ultra alta definición

venres, 10 de xuño do 2016 Marcus Fernández

Nos últimos meses xurdiron rumores dunha PlayStation 4 de ultra alta definición alcumada Neo que non fragmentaría o mercado, senón que simplemente ofrecería maior calidade gráfica nos xogos de nova xeración (que continuarían a funcionar nas PS4 normais) e que tería potencia dabondo para as esixencias actuais do mercado sen ter que iniciar unha nova xeración de consolas, e agora, o propio Andrew House, director executivo de Sony, nunha entrevista para o Financial Times recoñeceu que a nova consola será unha realidade, mantendo os dous modelos de consola á venda simultaneamente.
Os comentarios chegan máis aló, e confírmase que na feira E3 que bota a andar o domingo non se presentará esta nova consola, nin tampouco adiantan o prezo que terá, aínda que si aseguran que será máis cara que a PS4 actual. Estes comentarios tamén reavivan os rumores sobre Microsoft, e a súa Xbox One, que tamén podería seguir a mesma estratexia, presentando un modelo Scorpio máis adiante, e que sería bastante máis potente que a Xbox One actual e incluso que a PS4 Neo, apuntando a que deste xeito procuraríase que a consola puidese ser capaz de funcionar cos cascos de realidade virtual Oculus Rift, de xeito que a aposta pola realidade virtual de Microsoft sería máis ampla que a de Sony con PlayStation VR, avanzando na dirección de casar a Xbox One con Windows 10 en máis dun aspecto. De todos os xeitos fálase de que ese ano non se saberían máis detalles sobre esta máquina, e parece razoable, xa que é máis probable que antes lancen un redeseño da Xbox One (por exemplo, cun tamaño máis compacto) e tampouco resultaría intelixente anunciar con moitos meses de antelación unha consola mellor, xa que podería frear as vendas do modelo actual.

PUBLICIDADE