Confirman o lanzamento de LEGO Rock Band no inverno

Confirmando os rumores previos, Warner Bros Interactive, TT Games, LEGO Groups, Harmonix e MTV Games confirman que o vindeiro inverno sairá á venda o xogo LEGO Rock Band para PlayStation 3, Xbox 360, Nintendo DS e Wii, no que será un sorprendente salto para a franquía de xogos de LEGO, que normalmente adaptaba liñas de xoguetes baseadas en comics ou películas (Star Wars, Batman e Indiana Jones, para máis señas).
O novo título será igual que os Rock Band tradicionais no tocante ao seu sistema de xogo, pero incorporando a estética propia de LEGO, e que polo momento contará con cancións coma Song 2 (Blur), Kung Fu Fighting (Carl Douglas), The Final Countdown (Europe), Boys and Girls (Good Charlotte) e So What (Pink).
Aparte deste repertorio e de imaxes do xogo, pouco máis se coñece do mesmo, pero é de agardar que os personaxes de LEGO engadan algún tipo de toque humorístico á saga musical de Harmonix.