Conclúe na Coruña a xornada de negocios e novas oportunidades na Rede
venres, 28 de maio do 2010
Máis de
100 persoas procedentes do sector das novas tecnoloxías, dos negocios on-line, do marketing, das estratexías en liña e da innovación TIC, entre
outras disciplinas, participaron no día de hoxe na xornada B-web, un evento que tivo lugar na Coruña e no que os asistentes
comprobaron de primeira man as vantaxes das ferramentas 2.0 para o
posicionamento das súas empresas na Rede.
B-web reuniu a expertos de
“primeira liña” en materia de relacións empresariais a través da Rede
como Enrique Dans, Rubén Bastón, Nico Castro ou Daniel Seijo, que lle achegaron
ás persoas asistentes a súa visión das redes sociais, das weblogs, do posicionamento web, etc, que por certo, aseguraron, “están a mudar os modelos de negocio”.
A xornada dou
comezo ás 9 da mañá da man do profesor de Sistemas de Información IE Business
School, Enrique Dans, para dar paso ao relatorio posterior de Rubén Bastón, o
responsable de Social Media en Elogia Media, que falou sobre o uso e
instrumentación das redes sociais nas empresas.
Outros
importantes relatores como Nicolás Castro, Daniel Seijo ou José Manuel Alarcón,
director de Krasis, achegaron as claves para triunfar en Internet cunha web
funcional e atractiva, así como os desafíos e oportunidades que ofrece este
medio de comunicación en alza á hora de dar a coñecer os nosos negocios.
Na xornada da
tarde, as persoas asistentes tiveron a oportunidade de participar nunha mesa de
e-emprendedores, na que, entre outras
cousas, aprenderon a crear unha empresa a partir dunha rede social e a
aproveitar estas ferramentas para atopar clientes.
En total, foron
12 os profesionais do sector que analizaron as últimas estratexias de marketing que se están a levar a cabo en
Internet, o “último” en técnicas
comerciais en liña e o bo uso da redes sociais nas empresas, entre outros temas
de actualidade.