Comeza o Leadership Fórum eCommerce abordando o que poden facer as TIC polas nosas PEME
mércores, 6 de maio do 2015
Finalmente comezou onte a
terceira edición do Leadership Fórum eCommerce, un congreso de
InCoruña sobre xeitos de aproveitar o que nos brindan as TIC para
mellorar a nosa competitividade, e o evento foi inaugurado por
Victoria Vera, directora do programa eMarket Services do ICEX, quen
comezou explicando (precisamente) as vantaxes que pode supor para
unha PEME empregar as vendas en liña. Ao seu xuízo,
“internacionalizar e utilizar o comercio electrónico é a día de
hoxe unha necesidade”. Asemade, lembrou que en Internet “todo
empeza pola linguaxe”, polo que definir conceptos e palabras clave
debería ser un dos primeiros pasos a seguir por calquera estratexia
en liña que queiramos pór en marcha. Ou sexa, que cómpre ter un
tino especial na elección dos termos, pois deles van depender cousas
coma estas: que nos busquen e nos atopen, ou que nos atopen sen
buscarnos.
Segundo engadiu a
relatora, outra das claves para unha pequena empresa que queira dar o
chimpo a Internet é analizar en que canle quere vender e se desexa
facelo cunha plataforma ou cunha tenda propia. E explicou, apostando
por procurar o máis acaido ás necesidades e recursos: “Para unha
empresa con poucos recursos, os mercados electrónicos poden ser unha
opción moi interesante”. En semellantes termos expresouse Miguel
Ángel López, socio da Asociación de Emprendedores de Galicia
(ASCEGA) e coordinador do congreso: “Galicia queda nun recuncho de
España, pero en Internet somos todos iguais".
O evento continúa hoxe
en AFundación, na Coruña, ás 10.00 horas coa charla sobre
Vender/exportar a través de mercados electrónicos que
impartirán Manuel Camacho e Luís Carbajo, de Solostocks. Ás 12.00
horas será a quenda de Sheila Álvarez, directora de contas en
Elogia, quen falará sobre Mercadotecnia para ecommerce. Pola
tarde, ás 16.00 horas, Xavi Haro, CEO de Ecomm Galicia, explicará
as claves para crear unha tenda de forma sinxela e (case) gratis,
mentres que Xosé Rivera, CEO de DobleClick, falará ás 17.00 horas
sobre Como facer fichas de produto que vendan máis. Ás 18.00
horas, Juan José de Santiago, de Vodafone, terá un relatorio
titulado Retail meets ecommerce e Kike Soria, director de
Tech&Law, porá fin ao encontro ás 19:00 horas cunha charla
sobre Nova lexislación ecommerce. O presidente da Deputación,
Diego Calvo, será o encargado de clausurar, a as 20.15 horas, o III
Leadership Fórum E-comm.
Asemade, respecto aos
obradoiros previstos, sinalar que tralo taller de Ricardo Tayar, hoxe
impartirase o segundo obradoiro programado, na sede de ASCEGA (rúa
Matadoiro, 57) de 17.00 a 19.00 horas. A actividade en cuestión
virá da man de Improving
Metrics, e xirará arredor da analítica web (que, como, porqué
e despois que?). Improving Metrics, sinala a organización do
congreso, é un equipo de profesionais afincados en Coruña que conta
entre os seus clientes con algunhas das máis grandes empresas
nacionais e internacionais (de feito, moitos dos seus directivos
confían nas métricas que lles ofrece IM para tomar as decisións de
negocio axeitadas). Con este obradoiro, que se celebra hoxe a partir
das 17 horas, os participantes aprenderán a planificar unha
estratexia analítica, integrar e aplicar ferramentas axeitadas e
analizar os datos para tomar decisións que melloren a rendibilidade
do seu negocio, on/off line.