Comeza en Santiago o congreso CTMI: a gran cita internacional das matemáticas, as TIC e a innovación
luns, 22 de xullo do 2019
Hoxe
comeza en Santiago un dos grandes eventos científico-tecnolóxicos
da tempada, non só a nivel galego senón a nivel de todos os países
e dun nexo común que debera unilos a todos: a aposta polas ciencias
da computación e do cálculo para resolver algúns dos principais
retos mundiais que lles atinxen (ambientais, económicos, sociais,
médicos, urbanísticos ou científicos). Estamos a falar do primeiro
Congreso sobre
Transferencia entre Matemáticas e Industria, que vén
da man do Instituto Tecnolóxico de Matemática Industrial (ITMATI)
con sede no Campus Vida de Santiago.
Na
inauguración, celebrada hoxe a primeira hora da mañá na aula magna
da Facultade de Matemáticas, participaron Mª Vitoria Otero,
vicerreitora de Titulacións da Universidade de Santiago, Salvador
Naya, presidente do ITMATI, Peregrina Quintela, directora de ITMATI,
Elena Vázquez Cendón, decana da Facultade de Matemáticas da USC, e
Patricia Argerey, directora da Axencia Galega de Innovación (GAIN).
Segundo
fixeron saber, durante o congreso CTMI 2019 (que se estende até
pasado mañá, mércores 24) daranse a coñecer avances
significativos no eido da matemática industrial, a través das
experiencias de destacadas personalidades internacionais do ámbito
da empresa, a ciencia e o mundo académico, e todo “co propósito
de promover o uso das matemáticas máis innovadoras na industria”.
Os participantes proceden de diferentes países de Europa, América,
África e Asia; en particular de Francia, Hungría, Italia,
Luxemburgo, Noruega, Alemaña, Ucraína, Rusia, Estados Unidos,
Kazajistán e Alxeria; ademais de diversos puntos de Galicia e do
resto de España.
Detrás
deste importante evento atópase o Instituto Tecnolóxico de
Matemática Industrial (ITMATI), participado polas tres universidades
galegas e con sede no Campus Vida, que contará, para a realización
do congreso, co apoio da European Service Network of Mathematics for
Industry and Innovation (EU-MATHS-IN), a Axencia Galega de Innovación
da Xunta de Galicia (GAIN), a Rede Estratéxica en Matemáticas (REM)
e a Enterprise Europe Network.
- Peregrina Quintela, directora do ITMATI
A
finalidade concreta deste encontro internacional é a promoción e
difusión de ferramentas matemáticas xunto ás súas aplicacións
industriais. No transcurso do mesmo presentaranse novas liñas de
investigación orientadas ás necesidades da industria e da sociedade
en xeral, e daranse a coñecer algunhas experiencias singulares de
transferencia de resultados á industria. Tamén se porá foco en
mostrar como a colaboración entre o mundo académico e a industria
permitiu abrir novas liñas de investigación no eido das matemáticas
e a súa reflexión en publicacións de impacto internacional.
No
marco deste encontro terá lugar unha actividade paralela de
divulgación da tecnoloxía matemática á sociedade en xeral. Será
o 23 de xullo no Auditorio Abanca de Santiago (rúa Preguntoiro), de
20:00 a 21:00 horas. Antonio Pita Lozano, responsábel global de
analítica e consultoría en LUCA, Unidade de Datos de Telefónica,
ofrecerá a conferencia Datos e matemáticas. Os
propulsores das compañías data driven. Versará sobre o valor
da información para as empresas: un activo estratéxico para a
transformación dixital. Durante a súa intervención fará un
percorrido sobre o reto de sacar rendemento aos datos mediante
modelos matemáticos de Intelixencia Artificial e estatística co
obxectivo de aumentar os ingresos empresariais, reducir os custos e
mitigar os riscos para mellorar a xestión empresarial.
Congreso
bianual
A
deste mes de xullo en Santiago é a primeira edición deste congreso
de transferencia matemática en España, promovido pola Rede Española
Matemática-Industria (math-in) e que prevé ter edicións bianuais.
O CTMI 2019 é un evento satélite de ICIAM 2019 (International
Congress on Industrial and Applied Mathematics), un congreso que
se celebra cada catro anos. A anterior edición foi en Pequín e a
vindeira terá lugar en Xapón. Este ano celebrarase en Valencia a
semana previa ao CTMI 2019 de Santiago -do 15 ao 19 de xullo- e está
previsto que asistan máis de 4.000 congresistas.