Codebit abre nova oficina en Reino Unido e afianza o seu empuxe no mercado europeo
martes, 9 de agosto do 2016
A
empresa compostelá Codebit,
centrada no desenvolvemento de software de facturación e TPV
(Terminais Punto de Venda) específicos para todo tipo de negocios e
sectores, vén de dar importantes pasos no seu proceso de
espallamento internacional. Segundo informan fontes da firma, esta
vén de abrir nova oficina de traballo en Londres. O obxectivo:
reforzar e ampliar os seus servizos en toda Europa, logo de máis de
dúas décadas de presenza e actividade TIC no mercado estatal. “A
nova oficina”, informa Codebit, “servirá tanto para atender
dunha maneira máis rápida e personalizada aos clientes de Reino
Unido, como para promover novas oportunidades de negocio coas
empresas e profesionais na capital británica”.
As
dependencias acabadas de estrear en Londres, plenamente operativas
xa, atópanse no número 10 de Margaret Street, London, W1W 8RL.
Segundo explica Codebit, as oficinas están emprazadas no miolo do
capital e teñen capacidade de abonda para ofrecer os mellores
servizos ás empresas e profesionais do mercado británico.
“A
apertura en Londres é un fito máis no noso proceso de espallamento
internacional”, engaden os responsábeis da firma de Santiago, que
para este ano aínda teñen reservada algunha novidade importante
máis: por exemplo a apertura dunha nova sede de seu internacional,
máis concretamente en Irlanda. “Seguimos adiante co noso proceso
de pleno crecemento, despois de dúas décadas de experiencia no
deseño, desenvolvemento e venda de software de xestión para
empresas”, apuntan.
As
dúas oficinas, a de Londres e a de Dublín, constitúen polo tanto o
núcleo dos servizos de software que Codebit ofrece para o mercado de
fala inglesa. Asemade, son un xeito de “preparar o chimpo ao
mercado americano”, cun equipo de técnicos especializados segundo
o idioma e o sector de actividade, “e capaces de ofrecer os
mellores servizos TIC”.