Chega a quinta edición do certame que visualiza nas redes os negocios que fan uso do galego: #Fotolingua
luns, 6 de xullo do 2020
O
Concello
de Santiago presentou este luns os detalles da quinta edición do
concurso #Fotolingua, que, segundo fixo saber, renova o obxectivo
de visualizar nas redes sociais os negocios que se comprometen co uso
de galego. A nova edición do certame foi presentada en rolda de
prensa pola concelleira de Políticas Lingüísticas, Noa Díaz, quen
lembrou que calquera persoa pode participar publicando nas redes
fotografías orixinais que capturen elementos da paisaxe comercial
nos que se amose o galego (letreiros, escaparates, carteis,
sinalizadores, catálogos, etiquetaxe, menús...).
Noa
Díaz engadiu que as imaxes que se suban deben vir acompañadas cos
cancelos #fotolingua, #establecementoengalego, #ogalegovende e
#engalegofaiadiferenza e tamén indicar de que negocio se trata, onde
está e destacar algún aspecto da súa oferta, servizo, etc.
Segundo
explicou a edil respecto do elemento extra que constitúe o emprego
de galego a nivel comercial e publicitario, “nos servizos
comerciais non é indiferente a escolla lingüística, que pode
significar un plus que moita veciñanza valora, un xeito de
identificarse, diferenciarse da oferta foránea e de conectar e
achegarse á clientela”.
Premios
As
persoas que participen enviando as súas imaxes poderán obter un dos
dous premios do concurso, que consistirá en cadansúa tableta de
última xeración, unha por categoría: por unha banda á imaxe que
obteña máis gústame en Facebook ou likes en
Instagram na súa publicación orixinal e, pola outra, á imaxe que
sexa seleccionada pola organización atendendo á súa capacidade
para transmitir os obxectivos do concurso, “ben porque logra captar
algún uso do galego creativo e orixinal, ben polo coidado na
elaboración da foto”.
Unha
novidade desta convocatoria é a posibilidade de participar, ademais,
nun sorteo entre todas as persoas que envíen resolto o pasatempo que
inclúe o material publicitario do concurso e que se atopa
distribuído en comercios e establecementos hostaleiros. Entre todas
as respostas completas que se envíen de acordo coas bases do
pasatempo sortearase un vale de 100 € para gastar en
establecementos colaboradores.
Na
páxina web do Departamento de Lingua poden consultarse as bases
completas.