Chega á Universidade de Vigo o último en creacións literarias: os videopoemas

María Lado e Lara Bacelo acompañadas do profesor Manuel Forcadela

Nunha era na que practicamente todo nos entra polos ollos, e na que o audiovisual prima por enriba de tódolos contidos, son moitos os profesionais que teñen que recorrer á imaxe para chamar á atención do seu público obxectivo.
Conscientes disto, as escritoras Lara Bacelo e María Lado, da Universidade de Vigo, decidiron botar man das novas tecnoloxías para levar a cabo a súa última creación: uns videopoemas, cos que espertar o interese pola literatura dos seus compañeiros universitarios.
Segundo afirman dende a web da Universidade, “unha vocación literaria marcada e unhas tremendas ganas de modernización” son as dúas marcas características dos videopoemas que estas autoras presentaron na Facultade de Filoloxía e Tradución con motivo da terceira e última sesión do ciclo Escritores na Universidade.
As pezas proxectadas ao longo do relatorio, engaden, son un perfecto exemplo de innovación na transmisión do texto literario que “ademais resultan moi útiles para reflexionar acerca da relación entre o poético e o poemático”, segundo palabras do profesor Manuel Forcadela, que actuou como conductor do acto.
A teima de mudar a poesía “para que non caera no esquezo” foi o que levou a estas escritoras a apostar polas novas tecnoloxías, coas que fusionaron de maneira maxistral o son e a imaxe, facéndolle chegar a poesía a un público que se caracteriza por consumir, casi compulsivamente, só material audiovisual.
“Sen coñecermos, as dúas optamos por un formato moi parecido”, confesan, “no que tratamos de emular a animación fotográfica mediante a sucesión de imaxes con textos sobreexpostos”, explica Lado.
Bacelo e Lado decidiron explorar as posibilidades da edición de vídeo para satisfacer a súa necesidade de expresarse, de facer o que lles gusta, que é a poesía, porén son conscientes de que para espertar o interese da xente debían ir máis alá do simple texto literario e experimentar coa música, a palabra e o son.
Procedente das vangardas europeas, o videopoema “é un formato que as novas xeracións de escritores estamos reutilizando grazas ás enormes posibilidades que nos ofrecen as novas tecnoloxías”, explica Bacelo, quen engade que “en minutos podemos facer pezas que vinte anos atrás terían precisado de meses de traballo”.