Catro finalistas dispútanse o galardón do II Altia Premia TFG ETSE

martes, 30 de marzo do 2021 S. P.

Altia compartiu novidades respecto da segunda edición do seu Altia Premia TFG ETSE, convocado en colaboración coa Escola Técnica Superior de Enxeñaría da USC para distinguir e visualizar os mellores Traballos Fin de Grao abeirados ao centro. Segundo fixeron saber, hai catro finalistas que optan ao premio: Martín Aller Domínguez, José Antonio Cutrín Garabal, Raquel Rodríguez Vilas e Javier Val Barbeira. Foron seleccionados por un xurado composto por profesionais de Altia e por docentes e investigadores da ETSE.
O premio é froito da estreita colaboración que manteñen dende hai anos a firma TIC galega e ETSE de Santiago, onde se imparte o Grao en Enxeñaría Informática.
Os catro finalistas terán que presentar cadanseus traballos perante o xurado o vindeiro 9 de abril, no salón de actos da Escola Técnica Superior de Enxeñaría de Santiago de Compostela.
Este certame conxunto xorde co obxectivo de “premiar o talento, a paixón e o esforzo do novo talento dixital do alumnado do Grao de Enxeñaría en Informática, recompensando á persoa distinguida cunha contía de 1.500 euros”.
Para determinar a quen vai dirixido finalmente o recoñecemento avalíase a calidade do TFG e outros aspectos como a adaptación como produto ao mundo empresarial e a súa aliñación ás liñas estratéxicas de Altia, como poden ser temas de análise de datos masivos (Big Data), a Intelixencia Artificial (IA) ou a Ciberseguridade.

PUBLICIDADE