Catorce centros de ensino da nosa terra mostran na Maker Faire Galicia o empuxe argalleiro da nosa rapazada
venres, 20 de novembro do 2020
Este
venres a mocidade tecnolóxico-argalleira tomou a palabra na feira
Maker Faire Galicia 2020, o referencial evento de tecnoloxías libres
e participativas que celebran VermisLab, a Xunta e o Concello de
Santiago, e que chegou este 20 de novembro a un dos puntos
culminantes da actual edición (unha edición virtual por mor da
COVID): a xornada docente do evento. Nela participou o secretario
xeral de Educación e Formación Profesional da Xunta, José Luis
Mira, que tivo palabras para enxalzar o talento e as capacidades
creativas dos nosos centros de ensino, por exemplo os 14 centros
Primaria, Secundaria e Formación Profesional que presentaron este
venres os seus proxectos.
Un
pequeno satélite, unha estación de baixo custo para o control da
calidade da auga, ou o emprego da tecnoloxía ao servizo dunha
educación máis inclusiva e segura nos tempos da COVID-19, son
algúns dos proxectos presentados na Maker Faire Galicia 2020, que
por vez primeira dedica todo un día ao ámbito educativo.
O
programa pode seguirse enteiramente en liña desde calquera lugar e,
ademais de mesas redondas, charlas e obradoiros destinados a docentes
e alumnado, inclúe as presentacións de 28 proxectos de argalleiros
e argalleiras de Galicia, do resto de España, Portugal e o Brasil. O
secretario xeral de Educación e Formación Profesional da Xunta
participou na apertura do encontro, onde destacou “o bo facer de
alumnado e docentes que se reflicte en proxectos tecnolóxicos como
un minisatélite, unha estación de control de augas ou aplicacións
para crear escolas máis inclusivas e seguras nos tempos da
COVID-19”.
Neste
sentido, José Luis Mira tamén recoñeceu a calidade dos proxectos
presentadas nesta edición da Maker Faire, onde “podemos coñecer
ideas de todo tipo, desde iniciativas para que os máis pequenos da
escola traballen a motricidade fina e dean os seus primeiros pasos na
robótica, ata un robot deseñado para axudar na xestión das
emocións aos nenos e nenas con TEA, ou enxeñosas ideas para aplicar
a tecnoloxía fronte á pandemia, abrindo roupeiros e portas sen
chave ou accedendo aos ordenadores sen teclear”, salientou.
Do
total de 28 proxectos presentados no ámbito educativo, unha decena
de finalistas presentan o seu pitch en liña para seren
avaliados por un xurado especializado do CAFI, que decidirá os tres
galardóns do certame. Ademais do recoñecemento ao seu traballo,
recibirán como premio uns kits de robótica e electrónica básica
para continuar a desenvolver proxectos creativos e tecnolóxicos
desde o centro de ensino.
Entre
os 14 centros galegos que participan no encontro atópanse por
exemplo o IES A Pinguela de Monforte de Lemos, que deseñou e
construíu unha recreativa arcade totalmente personalizada e montada
polo alumnado; o IES David Buján de Cambre, con dous proxectos para
a creación dunha estación de baixo custo para o control da calidade
da auga dos ríos ou un espazo biomaker para facer
investigacións de biotecnoloxía en colaboración con escolas de
Lituania, Italia e Macedonia. Desde o IES Sánchez Cantón de
Pontevedra preséntase tamén un proxecto de minisatélite
desenvolvido por seis estudantes de Bacharelato para a competición
Cansat convocada por ESERO-Spain –organismo dependente da Axencia
Espacial Europea.
No
ámbito máis social, atópanse tamén propostas que tiran proveito
da tecnoloxía como ferramenta de axuda e inclusión, como o
presentado polos IES Zalaeta e o Centro de Educación Especial
Nuestra Señora de Lourdes, da Coruña, ou o proxecto Instituto
Ensino Secundario Seguro, xurdido no IES Maximino Romero de Lema da
Coruña ao abeiro das medidas de adaptación ao contexto da COVID-19,
co fin de crear espazos seguros dentro do centro educativo que
reduzan o contaxio do virus SARS-COV2. Con este proxecto preténdese
impulsar as habilidades STEM (Ciencia, Tecnoloxía, Enxeñaría e
Matemáticas) do alumnado, ao mesmo tempo que se procuran ideas
enxeñosas para aplicar a tecnoloxía fronte á pandemia e entre as
que se atopan abrir os roupeiros ou as portas sen chave, ou acceder a
ordenadores con tarxetas sen necesidade de tocar o teclado.
Desde
a plataforma en liña da
Maker Faire Galicia 2020 pode accederse a todos os contidos do
programa destes cinco días dedicados á creatividade e ao enxeño.