Carballo dá un novo pulo ao seu coworking para combater a crise con emprendemento

xoves, 21 de xaneiro do 2021 S. P.

Contra a crise sanitaria e económica, innovación e emprendemento. Esta é unha das fórmulas polas que aposta o Concello de Carballo, que aprobou este 18 de xaneiro unha addenda ao convenio de colaboración entre o Concello de Carballo e a Deputación da Coruña para o financiamento dun espazo de traballo colaborativo no Fórum.
Trátase de fortalecer o proxecto de coworking impulsado polas dúas entidades, “un espazo de traballo compartido para dar pulo á creación e consolidación de empresas vencelladas á cultura, ás novas tecnoloxías, á rexeneración urbana, ao benestar, aos servizos ás persoas, ao sector audiovisual, ao turismo, á investigación e á economía social”.
Na actualidade, no Carballo Coworking estanse a desenvolver 11 iniciativas empresariais nas que traballan 15 coworkers procedentes de diferentes municipios da Costa da Morte como Camariñas, Muxía, Zas, Ponteceso e, na súa maior parte, Carballo.
Entre os/as usuarios/as do espazo de traballo colaborativo atópanse 7 emprendedores, que, ben de forma individual ou en grupo, materializan 5 ideas/proxectos en realidades de mercado, iniciativas que forman parte da economía social, a cultura, as novas tecnoloxías e o audiovisual. Nestes sectores tamén se moven maioritariamente as 6 novas empresas, nas que traballan 8 autónomos/as, cunha antigüidade non superior a dous anos de exercicio empresarial (fase de incubación), e que no coworking desfrutan da posibilidade de dispoñer dun local e dunha serie de servizos e infraestruturas que contribúen a mellorar as súas posibilidades de éxito.
Servizos e contacto
Ademais dos 156 metros cadrados habilitados para un total de 18 postos de traballo, as persoas usuarias teñen á súa disposición un auditorio con capacidade para 100 persoas para actos públicos ou presentación; unha aula de formación, tamén destinada a sala de xuntanzas, sala de intercambio de experiencias e ideas, etc; zonas comúns (vestíbulo de acceso, recepción e zona de administración e área de descanso); acceso a medios audiovisuais, conexión a Internet de alta velocidade por cable e Wi-Fi.
O Carballo Coworking está aberto de luns a venres en horario continuado de 09.00 a 19.00. Para máis información podemos contactar a través do enderezo coworkingcarballo.gal ou chamando aos teléfonos 661 064 895 / 881 983 520.

PUBLICIDADE