Canon presenta a súa primeira cámara sen espello de fotograma completo

mércores, 5 de setembro do 2018 Marcus Fernández

Canon está a dar un grande paso adiante nas súas cámaras dixitais estreando unha nova familia de cámaras, as EOS R, que estrea un sistema de montura de obxectivo RF (que conserva a compatibilidade coas gamas EF e EF-S empregando un adaptador) e chega cun sensor de 30,3 Mpíxeles full frame (36 x 24 milímetros) con Dual Pixel CMOS AF, conseguindo así un enroque rápido e preciso á vez que captura en alta resolución.
O sistema EOS R ofrece obxectivos con grande capacidade de resposta e gravación de vídeo 4K (en arquivos de 10 bits), de xeito que resulta atractivo tanto para fotógrafos como para creadores de vídeo.
A Canon EOS R é unha cámara sen espello, ou sexa, que pese a ser full frame consegue un tamaño e un peso moi contidos, converténdose nun equipo máis versátil e práctico que a meirande parte das cámaras réflex. Mide 135,8 x 98,3 x 84,4 milímetros, pesa uns 580 gramos, pode disparar até 8 fotografías por segundo, integra conectividade Wi-Fi e Bluetooth, o seu visor ten unha resolución de 3,69 Mpíxeles, a súa pantalla LCD traseira queda nos 2,1 Mpíxeles cunha diagonal de 3,15 polgadas, integra flash, pode conectarse ao ordenador por USB-C e tamén conta con saída HDMI e entrada para micrófono externo.
Está previsto que a cámara Canon EOS R chegue ao mercado en outubro a un prezo de 2.299 dólares (o corpo) ou de 3.399 dólares (cun obxectivo RF 24-105mm F4 L IS USM), e confíase en que marque unha liña de cara o futuro das cámaras fotográficas dixitais.

As Canon EOS R conseguen a excelencia dos sensores full frame nun corpo compacto
A EOS R supón a estrea de toda unha gama de cámaras e obxectivos de Canon

Vídeo de presentación da Canon EOS R

PUBLICIDADE