Caixanova manterá a sede e o equipo directivo de R

Julio Fernández Gayoso nunha fotografía publicada polo Faro de Vigo

A nova de que Caixanova se facía coa meirande parte das participacións da operadora R é unha garantía para manter a galeguidade da compañía, e para concretar o que será o futuro da empresa de cable o presidente de Caixanova, Julio Fernández Gayoso, declarou que van «seguir mantendo a Honorato López Isla coma presidente do Consello», así como a Arturo Dopico e ao seu equipo pois «cando algo funciona ben é pecado cambialo». Tamén recalcou que dende Caixanova non pensan trasladar a sede de A Coruña a Vigo porque se trata dunha operación a nivel galego.
Gayoso asegurou que houbo un «entendemento rápido» con Unión Fenosa á hora de fixar o prezo das accións que fan que agora Caixanova conte cunha participación do 66,24% de R, compañía que prevé pechar o exercicio de 2008 cunha cobertura do 60% do territorio galego, uns 228.000 clientes (dos que máis de 41.000 son empresas) e 30.000 clientes de telefonía móbil.