Cae a idade media dos xogadores nos EE.UU.

A norteamericana Entertainment Software Association (organización semellante á española aDeSe) vén de publicar o seu informe anual sobre o sector dos videoxogos nos EE.UU. (descargable en formato PDF) sorprendendo por unha impresionante caída da idade media dos xogadores, que pasou de 37 anos en 2011 a 30 anos en 2012. Teriamos así que nos últimos meses reverteríase a situación á de 2005, desandándose o achegamento dos videoxogos a un público adulto, e volvendo en grande medida ao tópico de que é cousa de nenos, aínda que a estes resultados podería ter influído considerablemente a emerxencia de novos dispositivos de xogo (smartphones e tablets).
De todos os xeitos resulta notable que a proporción de xogadores de máis de 36 anos (37%) segue a ser superior que a dos menores de 18 anos (32%). Teriamos así que certas polémicas sobre os contidos dos videoxogos non terían moito sentido, pois claramente estarían dirixidos aos adultos, que con actualmente a meirande parte dos xogadores (o 68%).
Outro datos que tamén evolucionou nos últimos anos é o correspondente á fenda de sexo no sector, que cada vez é máis pequena, con só un 53% de xogadores masculinos en 2012 (cando o ano anterior era o 58%), destacándose o feito de que nos EE.UU. xa hai máis xogadoras de máis de 30 anos que xogadores de menos de 18.