Cabreiroá patrocina as principais ligas de eSports e videoxogos do ámbito hispano
mércores, 20 de xuño do 2018
A
firma galega Hijos de Rivera, responsábel de produtos senlleiros
como a cervexa Estrella Galicia e as augas Cabreiroá, vén de dar un
paso adiante en materia de transformación dixital. E faino a través
dunha práctica deportivo-tecnolóxica en proxección, os eSports,
e participando nas maiores competicións do ámbito hispano. Este
proceso, en termos máis concretos, colle corpo co
patrocinio de Cabreiroá, que se converte na auga oficial das dúas
maiores competicións do devandito ámbito hispano: a Liga de
Videoxogos Profesional (Grupo MediaPro) e a Electronic Sports League.
O
obxectivo é abranguer “novos públicos mediante novas ferramentas
de comunicación”. Tamén se busca botar un man á nova comunidade
de gamers (que xa acada millóns de persoas en todo o mundo) e
apoiar o seu medre.
Segundo
fai saber a corporación galega, “apostamos pola xeración dunha
canle propia de contido eSport que cobre necesidades
existentes na comunidade e achegámonos a youtubers de
referencia como TheAlvaro845 e Wizack”. A compañía tamén
salienta moi positivamente o feito de a súa auga mineral teña
presenza activa nos ditos acontecementos tecnolóxico-deportivos:
“Tanto aos xogadores e os equipos que integran a competición
profesional como os distintos traballadores da organización, entre
eles os comentaristas, os árbitros ou o persoal que está detrás
das cámaras, hidrataranse con auga Cabreiroá”.
Ademais,
Hijos de Rivera activará a presenza da marca en grandes eventos do
sector por exemplo Gamergy, que se celebra a vindeira semana e que
pasa por ser o evento de eSports e videoxogos máis
importante de España. A marca galega de auga agasallará neste marco
seis paquetes de experiencias VIP, cada un para catro persoas, que
inclúen a entrada a Gamergy, visitas guiadas ao backstage das
competicións que organiza LVP, encontros privados con xogadores e
comentaristas, regalos e material de promoción de LVP e acceso á
zona VIP. Os sorteos realizaranse nas redes sociais de Liga de
Videoxogos Profesional durante os próximos quince días.