Buscan fondos para lanzar unha secuela do clásico Bad Dudes Vs. DragonNinja
mércores, 18 de xullo do 2012
- Bad Dudes Vs. DragonNinja foi todo un clásicos dos salóns recreativos
O beat’em up de
1988 Bad Dudes Vs. DragonNinja
tivo moito éxito no seu día en versións para máquinas recreativas e adaptacións
para os ordenadores da época (dende o ZX Spectrum ata o Apple II) pero morrendo
como franquía. G-Mode adquiriu os dereitos de propiedade intelectual deste e
outros títulos editados por Data East, e agora xurde un grupo de
desenvolvedores que queren recuperar a marca adquirindo a súa licenza e publicando
unha secuela grazas a un proxecto de crowdfunding
en Kickstarter.
Pinstripe Games quere así facer realidade “unha
secuela que ninguén sabía que quería, ata agora”, para o que precisan
cartos para adquirir a licenza do xogo, así como para investir en software e
hardware para levar o seu proxecto a bo porto, para o que aspiran a conseguir
80.000 dólares antes do 8 de agosto. Comprométense a respectar o espírito oitenteiro do xogo orixinal, e tamén
permitir un modo cooperativo imprescindible para ser fiel ao título orixinal.
- Deseño conceptual para a secuela de Bad Dudes Vs. DragonNinja
Como vén a ser habitual neste tipo de proxectos de crowdfunding, aparte dunha copia descargable do xogo (por 10
dólares), os mecenas tamén poderán optar a outras recompensas como o acceso
anticipado á versión de proba, a banda sonora do xogo, posters, edición en
formato físico do xogo, deseños conceptuais do título e outros detalles entre
os que pode destacarse unha edición retro
de 16 bits do xogo coa que se incluirá un mando USB que imita ao da clásica
Super Nintendo e cartucho falso desta mesma consola que imita ser unha copia de
Bad Dudes 2 (xogo que claramente non saíu
nunca para SNES).
Así era o xogo de recreativa orixinal
