BioShock Infinite é un dos xogos incluídos en febreiro en PlayStation Plus

mércores, 22 de xaneiro do 2014 Marcus Fernández

BioShock Infinite é un dos mellores xogos editados en 2013

Hai uns días desvelamos que o xogo Outlast de Red Barrels podería gozarse de balde por parte dos usuarios de PlayStation 4 que estean subscritos a PlayStation Plus e hoxe confírmase que este título chegará o vindeiro 5 de febreiro, pero non é o único título confirmado para o mes de febreiro, senón que o vindeiro 29 de xaneiro recibiranse catro xogos máis a esta atractiva oferta da que poden beneficiarse usuarios de PS4, PS3 e PS Vita.
Os xogos para PlayStation 3 que se incorporan o vindeiro día 29 son auténticas xoias para os amantes dos xogos de acción, como o terrorífico Metro: Last Light e o multi-galardoado BioShock Infinite; para os usuarios da nova portátil de Sony, os xogos que estarán dispoñibles durante o mes de febreiro serán o beat’em up Dynasty Warriors Next e o xogo de condución con máis de 500.000 circuítos dispoñibles en liña ModNation Racers: Road Trip.
Non parece que os usuarios das actuais consolas de Sony vaian ter un febreiro tranquilo se aproveitan PlayStation Plus, servizo que non para de demostrar a súa rendibilidade por achegar títulos de primeira liña por un prezo moi reducido (aínda que o prezo anual de PS Plus é de 49,99 euros, existen ofertas puntuais moi agresivas).

Os usuarios de PlayStation Plus poderán gozar en febreiro do xogo Dynasty Warriors Next

PUBLICIDADE