Barrán estrea nova web e unha plataforma de aloxamento na nube
xoves, 8 de maio do 2014
O Grupo Barrán, empresa
de Compostela con longa experiencia en materia de desenvolvemento,
programación e formación arredor do software libre, está a
presentar estes días unha serie de novidades relativas a múltiples
aspectos da súa actividade. Por unha banda, a firma que dirixe José
Barrán ten entre mans unha
nova páxina web, lanzada oficialmente este mércores 7 de maio
co obxectivo de facilitar ao máximo a navegación entre usuarios e
visitantes xeral, ceibando o sitio en cuestión de todo aquel atranco
que se poida interpor entre o internauta e o contido que require.
A
web salienta tamén polo seu novo deseño, “un gran cambio de imaxe
para favorecer o acceso aos nosos produtos e servizos así como o
coñecemento da nosa empresa e as cousas que facemos”, cóntanos
José Barrán.
Por outra banda, a firma
de Santiago tamén deu a coñecer este mércores 7 de maio un servizo
novo que responde polo miúdo ás demandas de externalización de boa
parte das nosas empresas e profesionais, unha demanda que todo indica
que vai ir a máis agora que se consolidan a necesidade de optimizar
negocios e a idoneidade das novas tecnoloxías de vangarda para
facelo. Falamos de Espín Cloud, plataforma de aloxamento na nube
desenvolvida por Barrán e aloxada en cloud.grupobarransl.net.
A ferramenta lánzase cunha promoción a ter moi en conta: a empresa
oferta a todos aqueles que se rexistren na plataforma durante este
mes un servizo totalmente de balde por estar en fase de probas. Entre
outras cousas, poderán gozar gratis dun espazo de seu de cinco Xb.
Para rematar, Barrán
tamén presentou esta semana unha nova actividade formativa para
desenvolver nos meses vindeiros, máis polo miúdo a partir de
setembro. Trátase do curso Administración de sistemas e redes,
certificado de profesionalidade que abrangue unha duración de nove
meses divididos en 3 trimestres, máis outros 3 meses de formación
en centros de traballo. Como novidade, Barrán destaca que a todo o
alumnado que se matricule dotaráselle dun computador persoal para
facilitar o seguimento do curso, equipo que non terá que devolver ao
remate da actividade formativa. Para solicitar praza no curso
habilitarase nos vindeiros días a páxina
grupobarransl.net/formacion.
Mentres, os que así o desexen poden solicitar información ou praza
a través do enderezo info@grupobarransl.net. Salientar tamén cabe
destacar que o curso realizarase de xeito presencial e paralelo en
Santiago de Compostela e A Coruña.