Balidea pon a punto a web da Oficina de Seguridade do Internauta
luns, 21 de novembro do 2016
A empresa galega Balidea vén de desenvolver a
optimización e posta a punto do portal web da Oficina
de Seguridade do Internauta (OSI) do Instituto Nacional de
Ciberseguridad (INCIBE). O labor materializouse, en palabras de
Balidea, nunha
versión na que prima a marxe de uso a, accesibilidade, a proximidade
e a sinxeleza para o usuario. Entre outras melloras con respecto
ao anterior, realizouse unha migración completa á versión máis
actualizada do sistema de xestión de contidos Drupal. Así mesmo,
optimizouse o seu deseño para unha visualización adaptada a todo
tipo de dispositivos (computadores persoais, móbiles e tabletas).
Tamén se fixeron cambios para “cumprir con todas as esixencias de
seguridade requiridas polo INCIBE”.
Segundo nos conta Balidea, o sitio web en cuestión
ten unha funcionalidade dupla. Por unha banda proporcionar
información e, pola outra, facilitar o soporte preciso para evitar e
resolver os problemas de seguridade que poidan existir ao navegar por
Internet. Para o primeiro, o espazo dispón dunha parte informativa e
instrutiva que fornece datos salientábeis e consellos sobre “todo
aquilo que é preciso coñecer para obter unha protección axeitada
cando navegamos: seguridade nos diferentes tipos de dispositivos, na
información persoal que achegamos, nas redes Wi-Fi, os tipos de
fraude na Internet, etc”. A segunda vertente vén da man dun
servizo de axuda e soporte a través do cal os usuarios poden facer
todo tipo de consultas sobre seguridade na Rede, así como reportar
posíbeis fraudes. Para facilitar esta colaboración a OSI pon á súa
disposición un formulario de contacto e de alta de incidentes, así
como un número de Atención Telefónica ao Internauta.
Segundo lembra Balidea, o novo portal da OSI conta
tamén cun apartado que ten como obxectivo manter ao día ao usuario
en materia de seguridade na Internet. Nel recolle avisos de
seguridade relativos a correos electrónicos fraudulentos, campañas
de propagación de malware, roubos masivos de credenciais ou
contrasinais, fallos de seguridade de ferramentas ou actualizacións
importantes de aplicación. Asemade, incorpórase un blog de
actualidade con novas sobre a OSI e artigos ao redor de temas
destacados sobre novas tecnoloxías e seguridade. Por último, adica
unha sección para denunciar casos reais de persoas que foron vítimas
dalgún tipo de fraude a través da Rede.