Balidea encargarase da evolución das aplicacións do Servizo Cántabro de Saúde
mércores, 11 de setembro do 2019
A
empresa
TIC Balidea, con sede principal en Santiago, vaise encargar do
mantemento e evolución das aplicacións do Servizo Cántabro de
Saúde, ou sexa, das ferramentas asociadas aos sistemas de
historia clínica electrónica e de atención hospitalaria do Servizo
de Saúde. A firma galega desenvolverá estes traballos ao abeiro do
contrato que vén de renovar coa dita entidade. Para esta licitación,
Balidea concorreu en UTE con outras dúas empresas do sector TIC:
Horus Ingeniería e GTI Santander. O contrato ten unha duración de
dous anos coa posibilidade de renovación por outros dous.
En
detalle, o proxecto abrangue o soporte técnico e o mantemento
correctivo das incidencias que se produzan nos sistemas; así como o
mantemento evolutivo das aplicacións e o desenvolvemento ou a
renovación tecnolóxica. En particular Balidea xestionará tres
ferramentas principais: primeiro, o sistema de xestión de citade
especializada, procedementos e probas do Servizo Cántabro de Saúde,
así como as súas integracións co resto de sistemas asociados;
segundo, a solución corporativa para xestionar o bloque cirúrxico
de todos os hospitais (un sistema que abrangue todo o proceso desde
que se inclúe un paciente en lista de espera cirúrxica até que é
dado de alta polo cirurxián); e terceiro, a aplicación de rexistro
centralizado da lista de espera para citas, probas e intervencións
cirúrxicas.
Balidea,
Horus e GTI Santander son tres empresas tecnolóxicas especializadas
e con experiencia no ámbito sanitario. Uníronse para o
desenvolvemento deste proxecto co fin de lograr os seus obxectivos
“da forma máis eficaz e eficiente”, explican, engadindo que o
obxectivo é “achegar cada unha delas o seu coñecemento,
experiencia e capacidade en cada un dos ámbitos específicos do
contrato”.