Balidea creará unha ferramenta intelixente para a comercialización de madeira
mércores, 22 de maio do 2019
A
empresa
galega Balidea vén de anunciar que desenvolverá unha ferramenta
intelixente para a selección de produtos de madeira destinados á
construción. O proxecto pretende impulsar a cadea de valor deste
produto, dende que se extrae do monte até o consumidor final,
“fomentando un maior coñecemento do material para mellorar a súa
posición nos mercados e facilitar o seu uso en edificios
sustentábeis”. O desenvolvemento insírese na participación de
Balidea como socio tecnolóxico do grupo GO Madera.
Segundo
informa a empresa con sede en Santiago, trátase “dun proxecto
innovador que porá un selector de produtos (cuxa materia prima é
madeira de orixe estatal) a disposición dos arquitectos, axentes dos
sectores forestal e da construción, industriais e distribuidores”.
A ferramenta tecnolóxica incorporará datos técnicos e ambientais
dos produtos de procedencia española para pór de manifesto a súa
excelencia como material de construción, asociado a valores como a
sustentabilidade. “Con iso preténdese tamén aumentar a súa
competitividade no mercado”, explican dende Balidea, engadindo que
este traballo insírese no seu compromiso pola innovación
tecnolóxica aplicada á xestión e optimización dos recursos
forestais, “conscientes como somos de que é un sector no que a
sustentabilidade é un valor en alza e de que as TIC teñen moito que
achegar niso”.
O
proxecto Go Madera está liderado por PEFC España e a Universidade
de Córdoba, que exerce os labores de coordinación técnica do
proxecto. Outros membros do Grupo Operativo son INIA, o Instituto
Nacional de Investigación e Tecnoloxía Agraria e Alimentaria; o
Instituto Eduardo Torroja de ciencias da construción do Consello
Superior de Investigacións Científicas; e as empresas Cupa
Innovación, Búsqueda Justificada de Diferenciación e AENOR
Internacional.