Balidea certifica a súa aposta pola sustentabilidade e a calidade na produción
venres, 15 de xuño do 2018
- Diego Arias, director de Desenvolvemento e Produción da empresa galega Balidea
A
crise levou ás empresas do sector das novas tecnoloxías a optimizar
os seus procesos internos, polo que o sector galego acadou un nivel
de madurez máis alto, sendo referencia a nivel nacional e
internacional. Esta é unha realidade que se pode constatar e da que
podemos extraer unhas cantas claves de valor. Para dar conta delas
tivemos oportunidade de falar con Diego Arias, director de
Desenvolvemento e Produción da empresa galega Balidea.
Segundo nos fai saber, os procesos de dixitalización e
transformación interna deben ser pensados e medidos buscando a
eficacia, a eficiencia e a rendibilidade. “Cómpre aplicar
tecnoloxía operativa e produtiva, e non incorporala pensando que por
si soa mellorará a competitividade”, sinala.
-Como
director do departamento de Desenvolvemento e Produción TIC, que
análise fai da produción que está levando a cabo Balidea?
-O
reto que temos actualmente é o alto nivel de produción requirido
polos clientes. Sendo seguramente o momento de maior demanda de
traballo para a nosa área na historia de Balidea. É necesario facer
unha produción sostible e, sobre todo, cos niveis de calidade
axeitados, unha das nosas marcas de identidade. O noso obxectivo na
área de produción é obter a satisfacción nos proxectos en tres
liñas fundamentais: a satisfacción do cliente no produto obtido, a
satisfacción do grupo de traballo na realización do proxecto e a
satisfacción de Balidea no global do proxecto. Manter o equilibrio
neste tres aspectos é sempre complicado pero é iso onde incidimos
dende a Dirección de Proxectos.
-Como
afectou a crise ao desenvolvemento e a produción TIC en Balidea?
-Eu
sempre destaco que creo que no noso sector a crise foi de
rendabilidade máis que de carga de traballo. É verdade que durante
os anos da crise o sector público deixou de medrar e reducíronse as
tarifas e o sector privado baixou a súa demanda, pero a carga de
traballo mantívose nuns termos razoábeis (non así as
rendabilidades asociadas que baixaron de maneira substancial). Sen
embargo, coma sempre, débense converter as crises en oportunidades
de mellora. Iso levou ás empresas do sector TIC a optimizar os seus
procesos internos, traballar en proxectos de colaboración,
orientarse cara a outros produtos, abrir novos mercados, buscar a
excelencia… Todos eses traballos, que foron necesarios, leváronnos
aos integrantes do sector TIC galego a estar nun nivel de madurez
moito máis alto, sendo referencia a nivel nacional e internacional.
-Estanse
a notar aínda os seus efectos ou xa se pode falar de recuperación
neste sentido? Recuperáronse os niveis de produción anteriores á
crise?
-Os
niveis de produción xa son superiores aos previos da crise, polo
menos en Balidea. Seguramente tamén se deba á apertura de novos
clientes, novas colaboracións e novos mercados, pero si é certo que
a día de hoxe estamos nun intre de alta demanda de traballo. O que
si creo que se arrastra dende a crise, e que se debería abordar, é
unha aposta por parte do sector público para a mellora nas tarifas a
aplicar aos proxectos para continuar sendo unha referencia
tecnolóxica. Coa dinamización do sector privado e a limitación da
capacidade de crecemento das empresas do sector TIC isto pode acabar
sendo un problema para as administracións públicas.
-En
que medida a aplicación de novas tecnoloxías contribúe a aumentar
a competitividade das empresas?
-En
calquera sector onde unha empresa queira ser competitiva, un dos
aspectos que debe ter en conta sen lugar a dúbidas é a mellora dos
procesos e iso, normalmente, leva aparellada a aplicación de
tecnoloxía aos mesmos. O investimento en tecnoloxía ten un retorno
moi rápido e moi directo nas empresas. Iso si, é importante ter en
conta que temos que aplicar tecnoloxía operativa e produtiva, e non
incorporar tecnoloxía pensando que ela soa mellorará a
competitividade. Coñecemos casos tecnolóxicos de grande éxito
recente coma Google, Facebook, Whataspp, Instragram… Veremos que
non son complexos tecnicamente, pero conseguiron dar resposta a unha
necesidade de maneira efectiva, eficiente e sinxela. Ese é o
criterio a aplicar nas empresas.
-É
difícil desenvolver novas tecnoloxías nun sector tan marcado pola
súa rápida evolución?
-Non,
ao revés. Dispor de ferramentas de traballo novas, melloradas, en
constante evolución sempre é unha vantaxe. Eu creo que as
limitacións para os proxectos, polo xeral, non son tecnolóxicas.
Iso déixanos na tesitura de ser capaces de facer bos proxectos sen a
escusa tecnolóxica. Cando a xente non tiña ordenadores, as
comunicacións eran un problema. Non había cultura tecnolóxica…
iso si eran freos aos proxectos! Agora mesmo creo que está nas mans
das empresas, dos profesionais das mesmas e dos xestores por parte
dos clientes, ser capaces de crear bos proxectos. A competitividade e
o continúo cambio de tecnoloxías é unha maneira de manternos a
todos motivados e activos, o que redundará na mellora global do
sector.