Avanza Smartiago coa instalación de sistemas de control de tráfico con algoritmos
mércores, 19 de maio do 2021
A
peonalización da contorna da praza de Mazarelos, en pleno casco
vello de Santiago, vén de coincidir cun importante paso adiante do
proxecto Smartiago para converter a capital de Galicia nunha Cidade
Intelixente. Ao abeiro desta iniciativa, activada polo anterior
equipo de Goberno local e mantida polo actual, dispuxéronse
innovadores dispositivos de control de vehículos en enclaves como a
Porta Faxeira, a rúa das Ameas ou a Porta da Pena.
“O
obxectivo é reducir de forma drástica os desprazamentos con
vehículos contaminantes na cidade histórica e previr os danos en
pavimentos por acceso indebido de vehículos de tonelaxe excesiva”,
sinalan dende o Concello. Estes dispositivos de terra, que seguen en
certa maneira a feitura dos vellos bolardos que até o de agora
delimitaban o tráfico de Mazarelos e a súa contorna, compleméntanse
con 43 cámaras-vixía para ser instaladas en diferentes emprazados
da cidade e que dispoñen de algoritmos para detectar nas imaxes que
rexistran diversos elementos e distintivos dos vehículos, como por
exemplo a matrícula, a marca ou o tipo (se son bicis, motos,
turismos, camións ou vehículos de recollida de lixo e de limpeza
viaria, etc), entre outros parámetros e indicadores. Estas
tecnoloxías tamén serán quen de extraer información de valor dos
peóns, co fin de coñecer, por exemplo, o fluxo de turistas da
cidade.