AtlantTIC abriu as súas portas aos cidadáns co obxectivo de conectalos coa tecnoloxía

martes, 30 de novembro do 2021 Anxo Sesto

Unha nova xornada de portas abertas, este ano pudendo recuperar a presencialidade, tivo lugar este pasado venres 26 de novembro, pola tarde, no Centro de Investigación en Tecnoloxías de Telecomunicacións da Universidade de Vigo, AtlantTIC. Esta actividade, cuxo obxectivo é conectar á cidadanía coa tecnoloxía, forma parte do programa Divulgando Ciencia Singular do centro e reuniu nesta xornada a preto dun cento de persoas.
Da man das investigadoras e investigadores do centro, as persoas interesadas puideron descubrir as principais liñas de traballo que se desenvolven no centro: nanosatélites, impresión 3D, intelixencia artificial nas comunicacións, posibilidades que ofrece o taboleiro de cristal luminoso, comunicacións 5G, etc.
Tamén se realizaron, en grupos reducidos, visitas das instalacións principais, como a cámara anecoica do laboratorio de medidas radioeléctricas, o laboratorio de seguimento de satélites, e os proxectos que se están a desenvolver grazas a estas salas.
A organización destacou o éxito desta xornada de divulgación científica que contou cunha grande acollida no seu regreso ao formato presencial, despois de que o último ano se tivera que realizar de xeito virtual. Ao evento acudiron, tanto Alumnado de STEMBach do IES Valadares e grupos de familias, como persoas maiores e pequenas, todas elas interesadas en ver as actividades que teñen lugar no centro.

PUBLICIDADE