Até 60 locais dos concellos de Muros-Noia implantaron xa menús dixitais
venres, 28 de agosto do 2020
Os
alcaldes dos concellos da comarca de Muros e Noia e mailo
vicepresidente e responsábel da área de Turismo da Deputación da
Coruña, Xosé Regueira, participaron
no restaurante Casa Boto (Noia) na presentación das cartas de menús
dixitais promovidas pola Asociación Turística Ría da Estrela,
que segundo puidemos saber, chegaron
xa a 60 locais hostaleiros da contorna. Na súa intervención,
Xosé Regueira destacou o apoio da Deputación a iniciativas de
innovación como " elemento fundamental para a mellora da
calidade e competitividade dos xeodestinos".
A
Asociación Turística Ría da Estrela organizou este xoves un acto
para a presentación da nova iniciativa de menús dixitais que contou
coa intervención do vicepresidente e responsábel da área de
Turismo da Deputación da Coruña, Xosé Regueira, a presidenta da
entidade, María Teresa Villaverde e o alcalde de Noia, Santiago
Freire e no que participaron tamén representantes dos concellos da
Ría de Muros-Noia e do sector turístico da comarca.
Xosé
Regueira recoñeceu que o sector atravesa “un momento moi
complicado” mais avogou polo optimismo e por “tomar a crise como
oportunidade para gañar en competitividade e ofrecer garantías
suficientes de calidade e seguridade". Neste sentido, destacou o
apoio da área de Turismo da Deputación da Coruña aos entes de
xestión turístico como ferramentas de especial relevancia para saír
da situación actual e, en especial, ao desenvolvemento de
iniciativas innovadoras como os menús dixitais para a mellora da
calidade e competitividade dos xeodestinos.
As
cartas dos menús dixitais é un proxecto no que levan meses
traballando os concellos da Ría da Estrela, como “unha solución
tecnolóxica adaptada ás novas necesidades da hostalería derivadas
da situación propiciada pola COVID-19”. A solución, que como
dixemos está implantada xa nuns 60 locais de hostalería da comarca
de Muros e Noia (cuxas experiencias foron debulladas na cita deste
xoves), está estendéndose nos concellos de Noia, Muros, Porto do
Son, Outes e Lousame, que son os co-responsábeis de impulsar a dita
tecnoloxía e o programa no que se insire: un programa para facilitar
a adaptación dos establecementos turísticos ás medidas de
seguridade e control contra a pandemia.
O
proxecto está a ser tutelado pola Asociación Rural de
Desenvolvemento Ría Muros-Noia, na que están integrados os cinco
municipios, e conta cun orzamento de 14.000 euros (que aportan a
Deputación Provincial da Coruña e os concellos).
Os
servizos que veñen incluídos no programa xeral inclúen, entre
outras cousas, asistencia personalizada para cada negocio;
fornecemento de cartelería, sinalización e marcado de chans ou
resolución de dúbidas por vía telefónica ou telemática, amais
das cartas de menús dixitais que citamos antes, ás que o cliente
accede a través dun código QR.