Até 500 persoas confirmaron a súa participación nos Galicia Innovation Days, que comezan a vindeira semana
venres, 22 de outubro do 2021
Este
luns 25 de outubro arrinca finalmente a
primeira edición de Galicia Innovation Days, unha iniciativa da
Xunta e a Fundación Universidade Empresa (FEUGA) para dar a coñecer
as capacidades da nosa terra en investigación e innovación e
informar as oportunidades que se abren coas novas convocatorias de
Horizonte Europa (o programa de financiamento europeo de I+D+i que
conta cun orzamento de 95.000 millóns de euros para o período
2021-2027). FEUGA salientou a elevada participación confirmada para
os Galicia Innovation Days, con 500 participantes de 40 países de
todo o mundo.
As
xornadas, de carácter gratuíto, celebraranse en formato online
do 25 ao 29 de outubro. FEUGA confirmou que o evento espertou o
interese de investigadores, universidades, empresas e centros
tecnolóxicos de catro continentes.
O
luns, 25 de outubro, o director xeral de FEUGA, Javier Pereiro,
inaugurará as xornadas coas que a Fundación Universidade Empresa
Galega pretende potenciar unha das súas liñas estratéxicas: o
impulso á investigación e á innovación. “Galicia Innovation
Days é un punto de encontro, unha oportunidade para mostrar as
capacidades que existen en Galicia ante a convocatoria de Horizonte
Europa, que é o principal instrumento de financiamento da I+D e que
marcará o futuro do desenvolvemento tecnolóxico no continente. Que
Galicia teña presenza, a través dos seus investigadores e das súas
empresas, como socio neses proxectos é fundamentalmente o obxectivo
que temos desde FEUGA dentro do marco de colaboración coa Xunta de
Galicia como principal impulsor desta dinamización do tecido en
Galicia”, destaca Javier Pereiro.
As
xornadas contarán con expertos internacionais que abordarán os
distintos clústeres do programa Horizonte Europa para responder así
aos retos de futuro aos que se enfronta a nosa sociedade e o papel
que xogan a innovación e a investigación. Na primeira xornada,
adicada ao clúster da saúde e ao da cultura, a creatividade e a
sociedade inclusiva, celebrarase o relatorio de Francisco de la
Torre, representante da unidade de Democracia e valores europeos
da dirección xeral de Desenvolvemento e Innovación da Comisión
Europea.
Gerd
Schönwälder, policy officer para a
Transición Ecolóxica e Social da Comisión Europea, Garbiñe Guiu
Etxeberria, directora xeral de Investigación e Innovación -
Transformacións Industriais da Comisión Europea, e Inge Van Oost,
policy officer e directora xeral de
Agricultura e Desenvolvemento Rural da Comisión Europea, son o tres
relatores destacados do evento.
O
programa inclúe, ademais, mesas redondas e a presentación de
proxectos innovadores que contan con axudas europeas en ámbitos como
o clima, a transición ecolóxica, a transformación dixital ou a
agroalimentación, entre outros eidos. Así mesmo, os participantes
contarán co asesoramento dos puntos nacionais de contacto do
programa Horizonte Europa.
FEUGA
confirmou que un dos obxectivos de Galicia Innovation Days é o
fomento do networking
entre posíbeis socios e colaboradores. Asi, as persoas asistentes
poderán realizar intercambio de mensaxes e reunións individuais
durante as
catro xornadas a través da plataforma b2match.
Dez
anos no ámbito internacional
O
impulso á investigación e á innovación é unha das liñas
estratéxicas de FEUGA que conta cunha área de programas europeos.
A
Fundación Universidade Empresa Galega, cun equipo multidisciplinar
de expertos en international business e representación en
Bruxelas, eríxese como axente para facilitar as negociacións entre
empresas, investigadores e axentes públicos, representando os
intereses de distintos colectivos.
“Desde
hai máis de 10 anos contamos cun equipo dedicado á promoción e
execución de proxectos internacionais. Esa é unha das liñas de
actuación de FEUGA. Todo enmarcado nunha estratexia de rexión,
nunha estratexia de país, coa que estamos totalmente comprometidos”,
destaca Javier Pereiro.