ata 450 escolares de Lugo recibiron o carné de ciberexpert@

A subdelegada en Lugo, Isabel Rodríguez, participou este venres 13 de xuño no acto de entrega dos carnés de ciberexpert@ no CEIP As Gándaras (Lugo), acompañada polo formador da Policía Nacional Rubén Darío Veiga. Un total de 50 alumnos e alumnas de 6º de Primaria recibiron este recoñecemento tras completar o programa.
O acto de entrega serviu para facer balance do curso 2024-25, no que 450 escolares de Lugo recibiron formación en ciberseguridad grazas ao programa Ciberexpert@, desenvolvido pola Policía Nacional en colaboración coa Subdelegación do Goberno. A iniciativa chegou os dez centros da cidade: CEIP As Gándaras, CPR Salesianos, CPR A Inmaculada, CEIP Paradai, CPR Franciscanos, CEIP A Ponte, CPR Cervantes, CEIP Sacro Corazón, CEIP Albeiros e CPR Divino Mestre.
“A seguridade dixital da nenez e a mocidade é un reto colectivo, e desde o Goberno de España apostamos por formar ás novas xeracións no uso seguro da Internet e das redes sociais”, destacou Isabel Rodríguez, quen agradeceu o compromiso dos centros participantes e do equipo da Policía Nacional que desenvolveu o programa.
Segundo fixo saber, ao longo de catro sesións en cada grupo, os axentes traballaron co alumnado cuestións como a navegación segura, a xestión da privacidade en liña e fóra da Rede, o uso responsable das redes sociais e a prevención fronte aos riscos das Tecnoloxías da Relación, Información e Comunicación (TRIC).
“Este programa demostra que a prevención e a formación son as mellores ferramentas para protexer á infancia na contorna dixital”, sinalou a subdelegada. “As familias, o profesorado e, sobre todo, o alumnado, transmítennos o seu interese por seguir aprendendo sobre ciberseguridade. Esa resposta é a mellor motivación para continuar con esta iniciativa o próximo curso”, engadiu.
A xornada deste venres pecha un curso no que a educación en valores e competencia dixitais tivo un papel protagonista nas aulas lucenses, da man dunha iniciativa que busca dar ferramentas aos menores fronte aos desafíos do mundo dixital.