Até 200 fogares e empresas de Muros dispoñen xa das redes ultrarrápidas de R
xoves, 8 de novembro do 2018
Proseguen
os traballos da firma R
para introducir redes ultrarrápidas nas áreas da nosa terra que non
contan con elas. Entre as contornas onde se veñen de estrear estes
equipamentos de FTTH (Fiber To The Home) figura o concello de
Muros. O fornecemento desta infraestrutura implica a posta a
disposición de accesos de nova xeración (con servizos avanzados de
teléfono, Internet de alta velocidade e televisión dixital
multicanle de R) para 200 fogares e empresas do dito concello
coruñés.
Coma
noutros traballos semellantes, o operador galego salientou que o
remate do despregue de fibra óptica levouse a cabo “aproveitando
ao máximo as infraestruturas municipais da localidade”.
O
fornecemento de fibra en Muros abéiranse ao Plan PEBA-Avanza do
Ministerio de Economía e Empresa, do que R foi adxudicataria en 2016
para despregar FTTH (fibra até o edificio) nas chamadas “zonas
brancas”, é dicir, as que nunca dispuxeran de accesos de alta
velocidade até este momento. Xunto co da provincia da Coruña, o
operador galego conseguiu tamén a adxudicación doutros dous
proxectos; un, para as provincias de Lugo e Ourense e outro para a de
Pontevedra. En total, os tres proxectos supoñen un investimento de
preto de 8 millóns de euros, dos que 4,3 son subvencionados polos
fondos FEDER da Unión Europea, a través do Programa de Extensión
da Banda Larga de Nova Xeración (PEBA-Plan Avanza) do Ministerio de
Economía e Empresa.
Respecto
da provincia da Coruña, o investimento rolda os 3,8 millóns de
euros, dos cales 2,1 proceden dos fondos europeos.
R
engadiu que cando se completen os traballos de despregue nas catro
provincias galegas, arredor de 33.000 fogares e empresas destas
“zonas brancas” formarán parte do millón longo de fogares e
negocios que a día de hoxe están en disposición de recibir os
servizos avanzados de R en Galicia.