Asus trae a España o ROG Phone

Os smartphones para gamers levan uns meses chamando a atención mediaticamente, pero sen apenas ter presenza no mercado, de feito que a meirande de dispositivos nin sequera chegaron a venderse en Europa, e Asus parece querer aproveitar a situación, e o seu ROG Phone, presentado hai 5 meses, finalmente chega ao mercado español a un prezo de 899 euros, o que semella toda unha barreira, xa que o público ao que van dirixidos estes dispositivos non é precisamente o mesmo que o dos smartphones que normalmente se venden en tal rango de prezos.
Lembremos que o ROG Phone é un dispositivo cun procesador exclusivo Qualcomm Snapdragon 845 de 8 núcleos a 2,96 GHz con gráfica Adreno 630, 8 GB de RAM LPDDR4X, 128 GB de almacenamento interno (UPS 2.1), pantalla AMOLED de 6 polgadas cunha resolución de 2.160 x 1.080 píxeles e unha velocidade de refresco de 90 Hz (cun tempo de resposta de só 1 milisegundo) e con soporte de HDR, cámara traseira dual (de 12 e 8 Mpíxeles), cámara frontal de 8 Mpíxeles, Wi-Fi AD, Bluetooth 5.0, NFC, USB-C, DisplayPort 1.4, altofalantes estéreo frontais, batería de 4.000 mAh con carga rápida, un grosor de 8,6 milímetros e un peso de 200 gramos.
Teriamos así un smartphone cunhas especificacións moi semellantes ás dun Samsung Galaxy Note9, co que habería moi poucas diferenzas que fosen máis aló do estético, e dado que a pantalla de Samsung é claramente superior, resulta moi difícil xustificar o elevado prezo do dispositivos de Samsung.
O que si podería atraer a algúns xogadores é que o ROG Phone incorpora uns botóns ultrasónicos nos seus bordes, semellantes aos gatillos dun gamepad, que poden personalizarse en función do xogo, e tamén pode equiparse cun AeroActive Cooler para mellorar a súa refrixeración e permitir sesións de xogo máis longas e cun mellor rendemento. Como accesorios tamén conta cunha base para conectar o móbil a un monitor, a periféricos de control e incluso a Gigabit Ethernet, aínda que os máis rechamantes serían o o TwinView Dock (que engade unha segunda pantalla AMOLED de 6 polgadas, 4 altofalantes, dos gatillos hardware, mellor refrixeración e unha batería adicional de 6.000 mAh, convertendo o teléfono nunha especie de consola portátil) e o Asus WiGig Display Dock que en combinación con Gamevice permite transformar a consola nunha especie de Nintendo Switch conectada ao televisor sen fíos (aínda que cómpre lembrar que os mandos de Gamevice que se engaden lateralmente aos lados do teléfono non son exclusivos do ROG Phone, habendo versións para os principais smartphones de alta gama de Samsung, para os Pixel de Google e incluso para os iPhone de Apple).