Asus presenta un HDMI stick con 2 portos USB

mércores, 2 de setembro do 2015 Marcus Fernández

A primeiros de ano Intel anunciaba o seu Intel Computer Stick, un pequeno dispositivo que viña a ser como un ordenador compacto con Windows 8.1 que podía conectarse directamente a un monitor ou televisor para convertelo nun ordenador todo-en-un, e aínda que os primeiros dispositivos desta categoría tiñan bastantes limitacións, van evolucionando, sendo un dos máis atractivos o que Asustek presentou hoxe na IFA de Berlín, o Asus VivoStick PC.
Trátase dun ordenador en formato de stick HDMI que funciona con Windows 10, mide 137,9 x 34 x 14,9 milímetros e pesa 68 gramos, de xeito que case podería facerse pasar por una unidade de memoria USB, pero iso non lle impide integrar un ordenador con 2 GB de RAM, procesador Intel Cherry Trail, Wi-Fi N, Bluetooth 4.0, saída para auriculares e, como grande elemento diferenciador fronte a outros produtos semellantes, 2 portos USB.
Este dispositivo podería controlarse cun rato e un teclado USB, con periféricos Bluetooth e incluso a través do smartphone empregando unha aplicación móbil de Asus, de xeito que podemos aproveitar este pequeno dispositivo para empregalo como un ordenador tradicional ou como unha potente solución de reprodución multimedia. Un detalle que engade atractivo a este dispositivo é que venderase a 129 dólares (cando o equivalente de Intel custaría no contorno dos 150 dólares).

O principal atractivo deste HDMI stick é contar con 2 portos USB

PUBLICIDADE