Asus achega os seus smartwatches aos de Apple

luns, 1 de xuño do 2015 Marcus Fernández

A emerxencia de reloxos conectados levou a que moitos fabricantes apostasen por buscar un deseño coidado, no que a aparencia de reloxo fose predominante, e nesa liña Asus presentou hoxe o seu novo ZenWatch 2 no marco do Computex de Taiwan, destacando fronte ao seu modelo anterior por comercializarse en 2 tamaños diferentes (con correas de 22 e 18 milímetros), carcasas de aceiro inoxidable de 3 cores distintas e 16 combinacións de correas (en función da súa cor e material), polo que semella a resposta máis directa ao Apple Watch con Android Wear.
Precisamente un dos detalles que leva a pensar que estamos ante un produto moi inspirado no reloxo de Apple é o botón lateral (non presente no primeiro modelo), que lembraría á revolucionaria coroa do Apple Watch, aínda que neste caso o botón non conta con prestacións avanzadas.
Teremos que agardar á feira IFA de Berlín no mes de setembro para coñecer as especificacións completas, os prezos e a información sobre a distribución sobre este accesorio que parece chamado a converterse no Apple Watch dos que non teñen iPhone, e aínda que é de prever que sexa máis caro que boa partes dos reloxos que funciona con Android Wear, espérase que teña un prezo considerablemente inferior ao produto de Apple.


Vídeo de presentación do novo Asus ZenWatch 2

PUBLICIDADE