Asinado un convenio de colaboración entre o CPEIG e o CIE Mans
luns, 23 de maio do 2022
O
Colexio Profesional de Enxeñaría en Informática de Galicia (CPEIG)
e o Centro de Iniciativas
Empresariais Mans (CIE Mans) da Fundación Paideia Galiza
asinaron un acordo destinado a regular o seu traballo en común en
relación ao CIE Mans e ás condicións vantaxosas que este centro
aplicará ás colexiadas e colexiados do CPEIG. Asinaron o convenio o
presidente do CPEIG, Fernando Suárez, e o vicepresidente da
Fundación Paideia Galiza, Guillermo Vergara.
En
virtude desta alianza, as persoas integrantes do CPEIG poderán gozar
de descontos para estancias e alugueres, tanto nos servizos de
coworking Mans que dispón nos seus centros de A Coruña e
Padrón, como en oficinas. Tamén poderán beneficiarse de descontos
nas tarifas do alugueiro do Plató de Estudios Mans, un estudo de
gravación para impulsar o sector audiovisual e musical en Galicia. O
acordo terá unha vixencia dun ano, aínda que se poderá prorrogar
automaticamente.
O
CIE Mans é un espazo de coworking que busca a promoción e
apoio de proxectos empresariais. Achégase como un xermolo e un marco
idóneo de traballo para a promoción e desenvolvemento económico,
produtivo, social e cultural de sectores empresariais emerxentes e
innovadores. Pon á disposición de empresarios e emprendedores un
espazo de grandes posibilidades e próximo a outras empresas que
desenvolvan actividades complementarias. Os seus obxectivos son
“fomentar o intercambio de información e experiencias entre os
emprendedores e facilitar o desenvolvemento do tecido empresarial na
nosa terra apoiando á innovación nos distintos proxectos
empresariais e contribuíndo á creación de emprego en sectores
innovadores, diferenciados e estratéxicos”.