Asgoodasnew pide a fin da obsolescencia programada e lembra que xa hai máis terminais ca persoas
martes, 8 de marzo do 2016
Durante o 2014,
vendéronse 1.245 millóns de terminais en todo o mundo, mentres que
en 2015 a cifra seguiu aumentando até chegar aos 1.433 millóns. A
día de hoxe cóntanse no mundo 7.300 millóns de dispositivos, un
número que xa supera ao de habitantes do planeta (contando mesmo
bebés e nenos). Son cifras reflectidas pola plataforma Asgoodasnew,
que aproveita o abraio que provocan estes números para lembrar a
importancia de pór en xogo prácticas sustentábeis, rendíbeis e
respectuosas co medio ambiente en referencia ás novas tecnoloxías e
aparellos. A plataforma tamén tira partido da ocasión para esixir
dunha vez por todas o remate da obsolescencia programada, ou sexa a
funcionalidade dunha chea de aparellos, introducida pola gran
industria para ofrecer vidas útiles reducidas e favorecer o
recambio no mercado. Dito doutro xeito: trátase dunha caducidade
planificada polos fabricantes.
Segundo apuntan dende
Asgoodasnew nun comunicado, a vida real dun teléfono móbil
pódese alargar de certo até 5 anos máis do ciclo de vida
comercial. Esta é, de feito, a idea sobre a que se apoia a devandita
iniciativa e máis o seu portal de venda de móbiles, tabletas,
cámaras e obxectos practicamente novos (na súa maioría foron
apenas usados e non presentan máis que leves marcas de uso).
Como lembraremos, dende a
plataforma os responsábeis da mesma adícanse a mercar trebellos de
clientes privados e revisalos e restauralos “para darlles un
aspecto renovado”. Estes, recordan, vólvense pór á venda no
mercado a un prezo de entre un 30 e un 40% máis baratos respecto ao
prezo orixinal de venda, “o que se traduce nun aforro
significante”, lembran, ao que tempo que inciden no positivo desta
práctica, a de dar segundas vidas e terceiras vidas aos aparellos
electrónicos, xa que “é preciso rematar coa mentalidade obsoleta
de usar e tirar, porque a fabricación da tecnoloxía que carrexamos
nos smartphones e tabletas require de compoñentes altamente
contaminantes como plásticos, arsénicos, chumbo, cadmio, zinc,
ferro, cobre ou níquel”.
Segundo lembran dende a
plataforma, a Unión Europea publicaba en decembro un estudo onde
agoira “un aforro espectacular” dos recursos para o ano 2030 de
até 600.000 millóns de euros anuais, grazas a modelos de negocio
como Asgoodasnew que fomentan a chamada “economía
circular”.