Asesoría Informática Galega lanza un innovador produto de xestión para comercio, hostalaría e autónomos-profesionais
luns, 9 de febreiro do 2015
AIG, Asesoría
Informática Galega, vén de lanzar un novo produto “áxil e
intuitivo” para a xestión empresarial, a versión 6 do programa
ClassicGes. Segundo nos contan os responsábeis de AIG, firma
emprazada en Vigo e con máis de dúas décadas de experiencia en
desenvolvemento de ferramentas para facilitar o día a día
empresarial, ClassicGes 6 conta con tres versións, Comercio,
Hostalaría e Fabricación-Autónomos-Profesionais. Cada unha delas
vén preconfigurada para un diferente sector de actividade, sinala
AIG, que para este novo desenvolvemento tirou proveito do éxito
colleitado por plataformas previas, como por exemplo as versións
anteriores do propio ClassicGes ou as de ClassicConta e ClassicAIR.
Volvendo a ClassicGes 6,
dicir que inclúe ferramentas como o Buscador Global, unha
funcionalidade situada na propia interface do programa que permite
efectuar procuras en calquera intre e mesmo mentres estamos a
traballar con outras xanelas abertas e operativas. Tamén se inclúe
a ferramenta Facturación Electrónica, que posibilita que os
provedores que fornezan bens e servizos aos organismos públicos
sexan quen de desenvolver esta actividade acorde á nova lexislación.
O programa tamén permite
importar datos doutras aplicacións e ficheiros Excel para “poder
traballar dende ou primeiro momento sen que o rendemento da empresa
se vexa afectado”, cóntanos AIG, que lembra tamén que o produto
deixa unha ampla marxe de mobilidade, xa que podemos tirarlle partido
ou conectarnos dende calquera lugar a través de ClassicAIR. Ademais,
co pago dunha soa licenza definitiva (79,90 euros) déixase vía
libre para a conexión dun número ilimitado de postos.
Para facernos unha idea
do alcance deste recurso, AIG ten habilitada unha
ligazón específica cunha demostración. Amais, tamén se ofrece
un vídeo de presentación.