As tapas-teclado para Surface chegarán en dous modelos distintos

mércores, 24 de outubro do 2012 Marcus Fernández

Un dos detalles que máis captou á atención do público na presentación do Surface de Microsoft foi a súa tapa-teclado, quedando a dúbida de se sería confortable para traballar, e agora que estes accesorios figuran na páxina web de Microsoft de cara á estrea de Surface o vindeiro venres imos coñecendo os detalles deste tipo de accesorio, que chegará en dúas versións. Por unha banda teremos a impresionante Touch Cover, que cun grosor de só 3 milímetros achegará unha experiencia que promete dobrar a velocidade de tecleo nunha pantalla táctil, aproveitando tamén o seu deseño para venderse en 5 cores distintas (negro, branco, azul ceo, morado e vermello) que poidan reflectir a personalidade do usuario. Por outra banda tamén estará dispoñible a Type Cover, que con 6 milímetros de grosor consegue un acabado comparable ao dos teclados de moitos ultraportátiles, contando tamén con teclas de función, converténdose na opción ideal para usuarios profesionais. Ambos accesorios inclúen tamén un trackpad táctil, de xeito que converterían un tablet con Surface nun dispositivo semellante ao un portátil.
Un dos detalles máis interesantes destas tapas-teclado é que non se limitan a apagar a pantalla do tablet cando están pechadas, senón que tamén detectan a súa posición, de xeito que cando están abertos ata 180 graos operan con normalidade, mentres que se están abertos máis de 180º desactívanse as teclas e o trackpad para evitar pulsacións accidentais.

A Type Cover, con 6 milímetros de grosor, consegue unha experiencia de uso comparable á dos Ultrabooks


Interesante vídeo sobre a Touch Cover

PUBLICIDADE