As redes de última xeración chegarán en 2017 a sete polígonos de Lugo
martes, 28 de marzo do 2017
Segue
adiante a rolda de presentacións das actuacións previstas este ano
para equipar con redes ultrarrápidas os polígonos industriais da
nosa terra que non contan con accesos acaidos ás novas necesidades
de comunicación e promoción das nosas empresas. Se os días pasados
falamos dos fornecementos programados para as provincias de
Pontevedra
(con 11 polígonos a equipar este ano) e A
Coruña (con 10 complexos industriais no punto de mira deste
2017), hoxe
puidemos saber detalles concretos do roteiro preparado para Lugo:
un roteiro de despregues de fibra óptica até o fogar (tecnoloxía
FTTH) que abranguerá 7 enclaves empresariais.
As
actuacións, igual que nas restantes provinciais, desenvolveranse ao
abeiro do Plan de Banda Larga da Xunta. Os detalles foron dados a
coñecer hoxe pola directora de AMTEGA, Mar Pereira, o director xeral
de R, Alfredo Ramos, e o delegado da Xunta en Lugo, José Manuel
Balseiro. A empresa encargada do traballos, a operadora de raizame
galega R, fixo saber que os sete polígonos de Lugo nos que se
actuará ao longo de 2017 contarán, ao remate do mesmo, con
velocidades de até 350 Mpbs de baixada e 35 de suba, ao que cómpre
engadir unha garantía de caudal do 80% sen límite de descargas.
Na
presentación tamén se informou de que as actuacións do Plan
comezaron en 2016 e xa hai 1 polígono da provincia que dispón deste
servizo, que continuará estendéndose a outros 7 en 2018. “Unha
vez completado o Plan, o 85% das superficies empresariais ocupadas da
provincia terán acceso a redes de máis de 100 Mbps”, explicaron,
ao que Mar Pereira engadiu que a axencia que representa, AMTEGA, vén
de abrir unha convocatoria de axudas para dotar de redes
ultrarrápidas a empresas e autónomos das zonas máis illadas do
rural.
Igualmente,
no acto perante os medios a compañía R recordou que con estes
despregues e os servizos engadidos que achegan ponse a disposición
das empresas dos polígonos “a tecnoloxía precisa para acometer a
súa transformación dixital”. Ou sexa, servizos e solucións na
nube como por exemplo a videoconferencia, o acceso á Internet das
Cousas (IoT) ou os procedementos do que se coñece como Industria
4.0, vencellados a conceptos e metodoloxías como a eficiencia
enerxética, o control de intrusións nas edificacións, os
servidores virtuais e a analítica de datos (Big
Data), entre outros eidos. “Todas estas cousas e
outras moitas máis”, explicou a compañía de raizame galega, “son
posíbeis grazas ás vantaxes das redes FTTH (Fiber
To The Home) que levan a fibra óptica ata a propia
empresa nestes polígonos xa conectados ás redes ultrarrápidas de
R”.
AMTEGA recordou que ao abeiro do dito Plan, en 2016,
completouse o despregue en 17 polígonos en toda Galicia, estando
previsto cubrir este ano outros 30 e en 2018 os 34 restantes. “Deste
xeito”, engadiu Pereira, “no ano 2018, un total de 130 polígonos,
nos que se concentra case o 93% da superficie
empresarial ocupada, disporán de acceso a redes de máis de 100
Mpbs”.
Tamén fixo fincapé en que para aquelas empresas que
estean fóra dos recintos fabrís ou en zonas illadas, o Plan de
Banda Larga tamén abrangue unha convocatoria de axudas para
subvencionar até nun 100% os custos das tarefas necesarias para
dotar de banda larga ultrarrápida as devanditas empresas afastadas,
até un máximo de 20.000 euros por beneficiario.