As profesións TIC estiveron entre as máis demandadas na Feira de Emprego da Cámara da Coruña
mércores, 31 de maio do 2023
Este
martes 30 de maio celebrouse en Carballo a XIII
Feira de Emprego da Cámara da Coruña, na que participaron uns
120 mozos e mozas e 30 empresas con procesos de selección abertos.
Como resultado realizáronse unhas 600 entrevistas de emprego que
poderían dar como froito a incorporación ao mercado laboral duns
cincuenta participantes na feira. Buscábanse principalmente persoas
formadas en medio ambiente, tendas de alimentación e retallistas,
axentes comerciais, enxeñería industrial, informática,
telecomunicacións e electricidade.
No
acto de inauguración participaron o alcalde de Carballo, Evencio
Ferrero e a vicepresidenta da Cámara, Luz Pardo, quen salientou que
“na actualidade, no Programa de Garantía Xuvenil temos inscritos,
en expectativa de emprego, a 9.368 mozos, pertencentes os 39
municipios que conforman a demarcación cameral, un dato que vén
descendendo nestes últimos anos. A través do PICE, levamos
impartido máis de 500 accións formativas e preto de 4.000 mozos
formáronse connosco”. Pardo tamén salientou a entidade conta
ademais co estimábel labor do Viveiro de Empresas de Carballo,
activo desde hai máis de 15 anos e que axudou a despegar a un
importante número de iniciativas emprendedoras, “achegándolles
ese apoio tan necesario nas primeiras fases de consolidación e
crecemento”.
Pola
súa parte, Evencio Ferrero detacou “o potencial do Fórum Carballo
como centro acolledor de novas iniciativas e actividades formativas.
Porque a formación é a base, o camiño a seguir para atopar un
emprego que realmente faga felices ás persoas. As trinta empresas
que hoxe están aquí representadas ofrécenvos unha estupenda
oportunidade para que poidades atopar o voso espazo laboral”, dixo.
No
transcurso da mañá, e en paralelo á realización de entrevistas,
as persoas demandades de emprego puideron asistir a seminarios
deseñados para axudarlles a mellorar a súa empregabilidade,
dotándoas de ferramentas e dándolles consellos prácticos para
participar en procesos de selección. Os mozos e mozas puideron
coñecer o Programa da Cámara, Somos FP Dual, co relatorio dun dos
seus embaixadores.
As
empresas que participaron son: APECCO, Arce Clima, Areté Gestión de
Personas, ASEB (Asociación de Empresarios de Bergondo), Carrefour,
CIE Tecnología, Clece, Disashop, DomusVi, Eulen - Flexiplan, FUAC
(Fundación Universidade da Coruña), Fundacion Equipo Humano,
Gadisa, Genesal Energy, Gi Group, Grupo Aluman, Grupo Calvo, Grupo
Externa, Grupo Gestán, Iman Temporing, MMypem by Voltam, Northius,
Pacto, Repsol, Synergie, Teiga TMI, Temporing e Vegalsa-Eroski.
A
Feira de Emprego da Cámara da Coruña enmárcase no Programa
Integral de Cualificación e Emprego (PICE) das Cámaras de Comercio
de España. É un dos instrumentos que articulan en España o
Programa Operativo de Emprego Xuvenil 2014-2020 do Fondo Social
Europeo e forma parte do Sistema Nacional de Garantía Xuvenil, unha
iniciativa do Ministerio de Traballo e Economía Social en coherencia
coa Estratexia de Emprendemento e Emprego Novo. O seu obxectivo é
“apoiar a redución da taxa de desemprego entre os mozos,
mellorando a súa cualificación e empregabilidade e promovendo o
autoemprego”.