As posibilidades das TIC para a nosa economía social, ao detalle o 7 de novembro na Coruña
xoves, 31 de outubro do 2019
A
Unión de Cooperativas Galegas Espazo Coop organiza a vindeira
semana, o 7 de novembro, un encontro sobre as posibilidades das máis
novas ferramentas para fortalecer a viabilidade, a visibilidade e a
rendibilidade dos nosos proxectos solidarios de mercado. Trátase dun
seminario que xirará arredor da presentación da Axenda
para o fomento e a creación de empresas de Economía Social
no sector das Tecnoloxías da Información e a Comunicación na
Eurorrexión. Será a partir das 11.00 horas no Mercado de
San Agustín da Coruña.
O
documento, elaborado por Espazo Coop no marco do proxecto europeo
LACES, recolle un plan estratéxico para impulsar a creación e o
fortalecemento de empresas na contorna galego-portuguesa (en ámbalas
beiras da raia) ao abeiro dun sector no que, segundo informa a unión
de cooperativas, “a economía social non está representada como
debera”. A partir dunha diagnose do panorama empresarial nas dúas
beiras do Miño, a axenda propón “distintos mecanismos destinados
a identificar oportunidades de negocio asociadas ás TIC e a
Industria 4.0 e a impulsar a modernización e competitividade das
empresas galegas e portuguesas do sector”.
A
presentación, que
se realizará no marco da programación da Mostra de Iniciativas de
Economía Social Pop-up, comezará ás 11:00 horas coa benvida e
presentación do Proxecto LACES por parte de representantes da
Subdirección Xeral de Economía Social da Xunta de Galicia,
Espazocoop, a Universidade Trás-Os-Montes e Alto Douro (UTAD) e o
Centro de Incubação de Base Tecnológica do Minho (In.Cubo).
Seguidamente, ás 11:15h. a presidenta de Espazocoop, Ana Olveira,
realizará a presentación dos contidos da Axenda do Sector TIC. De
seguido celebraranse as exposicións da Axenda para o fomento e a
creación de empresas de Economía Social no sector do Turismo e
da Axenda para o fomento e a creación de empresas de Economía
Social no sector dos Servizos Sociais, con Patricia António, da
UTAD; e Fernando Cabodeira, consultor de In.Cubo, respectivamente.
Finalmente,
ás 12:45h arrancará a mesa sectorial de experiencias de economía
social Outros modos de facer economía, na que participarán
Asier Epelde, de Ítaca Software Libre S. Coop. Galega, por parte do
sector das TIC; Xerardo Pereiro, do proxecto GeoArpad, en
representación do sector turístico; e Antía Pousa, de Xeracción
S. Coop. Galega, entidade do sector dos servizos sociais. Ao final
das intervencións, abrirase un pequeno coloquio coas persoas
asistentes á palestra coa que se pechará a xornada.
Para
a participación no seminario, que é de balde, é
preciso inscribirse previamente no formulario habilitado en liña.