As ligazóns galegas de Picasso centrarán as novas visitas virtuais de Turismo da Coruña

Turismo da Coruña proseguirá as experiencias desenvolvidas as pasadas semanas, dende o inicio da crise sanitaria, divulgando o patrimonio histórico e cultural da cidade en formato virtual e co gallo de animar e formar a xente de todas as idades (facendo un fincapé especial na rapazada) en tempos de confinamento. Esta semana, tralo éxito acadado polas visitas virtuais feitas para mostrar a Torre de Hércules e a súa contorna, o departamento turístico coruñés fai unha proposta de dúas novas visitas que darán a coñecer a etapa na que o pintor Pablo Ruíz Picasso viviu na cidade herculina.
Desta volta, o fío temático será “un dos grandes referentes artísticos mundiais”, que viviu a súa primeira etapa de pintor na cidade galega.
A primeira das visitas será este xoves 16 ás 12h en directo na páxina de Facebook de Turismo da Coruña e a seguinte o domingo 19 á mesma hora aínda que nesta ocasión orientada a que poidan coñecer a súa historia as nenas e nenos.
Ata o momento, neste primeiro mes de confinamento, as visitas virtuais guiadas levan acumuladas arredor de 50.000 reproducións. Na vindeira semana está previsto que esta nova maneira de coñecer a cidade se traslade ao Camiño Inglés do que A Coruña é porto de chegada.