As lentes de realidade aumentada de Sony chegarán a España en marzo

martes, 17 de febreiro do 2015 Marcus Fernández

O pasado mes de setembro Sony presentaba as súas SmartEyeglass, unha solución de realidade aumentada a través de lentes binoculares que para o mes que vén estarán dispoñibles para a súa venda en 10 países (entre os que está incluído España), pero que dende hoxe mesmo xa poden encargarse dende Reino Unido e Alemaña nunha edición para desenvolvedores coñecida como SmartEyeglass Developer Edition SED-E1, que terán un prezo de 670 euros, aínda que polo momento estariamos ante un produto para o desenvolvemento que só se vendería para empresas.
Estas curiosas lentes buscan facer un achegamento semellante ao das Google Glass, pero parten dunhas especificacións máis modestas, o que faría máis doada a súa implantación en ambientes corporativos (xa que o seu prezo de partida é considerablemente inferior). A pantalla que integran as lentes ten unha resolución de 419 x 138 píxeles, xerando as imaxes en 8 tons de verde e presentando 15 imaxes por segundo.
As Sony SmartEyeglass integran unha cámara de 3 Mpíxeles, acelerómetro, xiroscopio, compás dixital, sensor de luz ambiental, micrófono con cancelación de ruído, Bluetooth 3.0, Wi-Fi, NFC e un controlador externo. Son compatibles con Android 4.4 e superior, pesan 77 gramos sen contar os cables nin o controlador (que pesa 44 gramos) e a súa autonomía sen empregar a cámara sería de 150 minutos, reducindo a 80 minutos cando empreguemos a cámara.
Queda agora por ver os usos que se lle van atopando a esta tecnoloxía, que podería servir para engadir información ao que estamos a ver (estatísticas dos xogadores mentres vemos un partido), datos do lugar onde nos atopamos (durante unha visita turística) ou incluso para presentar instrucións paso a paso sobre como realizar unha reparacións sobre un motor ou sobre os paquetes que hai que trasladar nun almacén. Toda unha sorte de posibilidades que deberán explorar os desenvolvedores para ver se esta tecnoloxía pode converterse nunha realidade en meses, ou se queda no conxelador indefinidamente como parece que está a pasar coa proposta de Google.

PUBLICIDADE