As audioguías da Mariña de Lugo xa se poden escoitar en inglés, francés e castelán
venres, 12 de abril do 2019
O
deputado de Turismo da provincia de Lugo, Eduardo Vidal Baamonde
participou este venres na
presentación da nova promoción das audioguías ficcionadas da
Mariña. A cita foi na Casa Museo de Álvaro Cunqueiro, en
Mondoñedo, onde se fixo fincapé nas posibilidades de comunicación
e interacción que ofrecen estes recursos turísticos teatralizados
sobre os cascos históricos de Mondoñedo, Ribadeo e Viveiro. As
audioguías dixitais, como lembraremos, foron presentadas hai un ano
pola Deputación de Lugo e a Mancomunidade de Municipios da Mariña.
Agora veñen de perfeccionarse coa tradución dos contidos ao inglés,
francés a castelán.
No
acto de presentación tamén participaron o delegado territorial da
Xunta de Galicia, José Manuel Balseiro Orol, a alcaldesa de
Mondoñedo, Elena Candia López, a concelleira de Desenvolvemento
Local e Turismo do Concello de Ribadeo, Ana María Martínez
Fernández, o tenente de alcalde de Viveiro, Jesús Fernández
Fernández e o presidente da Mancomunidade de Municipios da Mariña e
alcalde de Burela, Alfredo Llano García, entidade coa que colabora o
Organismo provincial e creadora desta iniciativa turística.
Amais
das opcións lingüísticas devanditas, a optimización desta
contribución turística sobre os cascos históricos da costa lucense
complementouse con material como folletos e carteis para difundir e
dar a coñecer nas oficinas de turismo as audioguías ficcionadas da
Mariña de Lugo que tamén estarán dispoñíbeis para a descarga e
reprodución de balde na web
da Mancomunidade.