As TIC afórranlle á Deputación de Lugo ata 100.000 euros por Concello
xoves, 1 de xullo do 2010
O presidente da Deputación de Lugo, José Ramón Gómez Besteiro, sabedor de
que o futuro das distintas administracións calqueira que sexa o seu tamaño e
entorno, reside nas novas tecnoloxías e Internet, vén de presentar este mércores
o novo Centro de Proceso de Datos (CPD) da entidade pública que preside e dos
Concellos que se adheriron ó Innova-TE,
no cal se almacenará e centralizará toda a información dos devanditos
organismos para falicitarlle á cidadanía a súa relación coa Administración.
Isto permitiralle aos veciños e veciñas que residan na zona, realizar ata
120 trámites coa Administración a través de Internet, sen ningún outro
requisito que conectarse á Rede e acceder á páxina do Centro.
Gómez Besteiro salientou que “o CPD é
o corazón do noso programa tecnolóxico, o sistema que bombeará os datos dende a
Deputación ós Concellos e viceversa. É o punto de partida da e-administración
na provincia, é dicir, o Km0 do noso Km@”.
Logo das
auditorías tecnolóxicas de rigor realizadas nos Concellos, a Deputación
constatou que só 13 municipios teñen un Centro de Proceso de Datos, malia que a
lei obriga ás Administracións a ter un. Asemade, a maioría dos Concellos só dispoñen
dalgún servidor de escasa velocidade, sen capacidade de almacenamento, e con graves
carencias en materia de seguridade. O organismo provincial pon agora a
disposición dos municipios que se sumaron ó Innova-TE
, (un total de 50 ata o momento), un sistema de última xeración cos servidores
e aplicacións imprescindibles para a implantación da administración electrónica
na provincia.
Isto conleva
unha serie de vantaxes que o resto dos municipios deben ter en conta para adherirse
ao Innova-TE; por unha banda a
vantaxe económica xa que o programa ofrécelle aos Concellos a infraestrutura de
balde (aforrándolle un total de 100.000 euros) e pola outra a vantaxe da
seguridade, xa que o novo Centro está controlado informaticamente cada segundo
das 24 horas do día os 365 días ao ano, evitando ataques informáticos.
Este sitúase nunha cámara auto-refrixeradora que, a súa vez, atópase nunha
sala acristalada no Pazo de San Marcos baixo fortes medidas de seguridade como
cristais blindados ou unha entrada con acceso restrinxido. Ademais, na actualidade
o organismo provincial xa traballa na instalación dun CPD de Respaldo nas
instalacións da Fundación TIC no Polígono do Ceao que, en caso de accidente,
actuará para que non se perda a documentación como sucedeu logo do incendio no
edificio Windsor de Madrid. O Presidente salientou que “os Concellos non teñen
recursos para isto, e hai que ter en conta que este corazón bombeará datos persoais,
fiscais, contables, etc”.
Por último, unha terceira vantaxe radica en que o CPD permitirá que máis de
1.000 persoas interactúen coa administración de forma simultánea ao estar
composto por material de última xeración e de baixo consumo. Deste xeito, posúe
a mesma memoria RAM que 500 ordenadores. Asemade, ten varios discos duros cunha
capacidade de almacenaxe de 32.000 xigas onde se poderán gardar ata 17 millóns
de libros electrónicos, ou mesmo 3,5 millóns de documentos dunhas 100 páxinas. Con
este novo hardware, o organismo multiplica por 5 o espazo de almacenamento de
datos actual.
Porén, o mellor de todo isto é que na Deputación pensan reciclar o antigo
CPD, que seguirá dando soporte ás áreas internas de Contabilidade e Recadación.
Agora, a intención deste organismo provincial é sensibilizar á cidadanía
das vantaxes da Administración electrónica, algo que fará in situ dende o Pazo Provincial, onde as persoas que se acheguen recibirán
cadanseu USB en forma de chave como símbolo dunha “Deputación sempre aberta”.