As II xornadas de OpenERP contarán con presenza galega nunha mesa redonda

Os vindeiros 17 e 18 de abril, a Universitat Politècnica de Catalunya, situada en Barcelona, acollerá as segundas xornadas de OpenERP que se celebran en España, un evento que pretende ser un punto de encontro entre usuarios, instaladores e programadores de OpenERP de todo o mundo e un lugar no que dar a coñecer as funcionalidades desta ferramenta de grande utilidade para todo tipo de empresas.
As xornadas, asemade, permitiranlles aos non iniciados, descubrir o seu ecosistema mediante actividades de difusión e relatorios así como coñecer os casos de éxito e modelos de negocio existentes mediante unha mesa redonda e diversos titoriais.
No programa provisional, que se pode descargar de balde na web do evento, figura a asistencia da empresa galega Pexego, que, da man de Santiago Argüesto, vai participar na mesa redonda, Como facer negocio con OpenERP, casos de éxito.
Este acto en concreto, terá lugar o vindeiro venres 17 de abril en horario de 12:15 a 13:30, e nel, os asistentes poderán comprobar de primeira man o funcionamento deste completo sistema de xestión de empresas de licenza libre, que cobre todas as necesidades da área de contabilidade, marketing, recuros humanos… de calquera empresa.
Segundo apuntan na web de Mancomún, esta ferramenta era coñecida anteriormente co nome de TinyERP e “estaba traducida ao galego na súa versión 4.0.3, incluída no DVD da PEME”.
A entidade que representa Argüesto, Pexego Sistemas Informáticos, é unha empresa que desenvolve a súa actividade no ámbito das novas tecnoloxías da información e da comunicación (NTIC). Trátase, segundo afirman, dunha "Iniciativa Empresarial de Base Tecnolóxica", cualificada pola Xunta de Galicia.