As 20 firmas que sexan seleccionadas para ViaExterior contará cun campus de formación online as 24h
mércores, 7 de setembro do 2022
O
delegado do Estado no Consorcio da Zona Franca de Vigo (CZFV), David
Regades, presentou na mañá deste 7 de setembro a quinta edición de
ViaExterior, a aceleradora multisectorial promovida pola propia
entidade, que asesora e forma a pequenas e medianas empresas galegas
co obxecto de iniciaren ou consolidaren os seus plans de expansión a
mercados exteriores. Segundo dixo, as compañías interesadas en
participar na nova convocatoria xa poden formalizar a súa inscrición
con carácter online ata o 30 de setembro a través da web
viaexterior.com.
Na
súa intervención, Regades sinalou que “son máis de cen as
empresas que pasaron por ViaExterior e o 90% logrou entrar en polo
menos un novo mercado, o que mostra que o éxito do programa está
garantido”. Engadiu tamén que “debido ao aumento das
exportacións, estas empresas tiveron que contratar persoal para a
área internacional, tras o seu paso polo programa”. O delegado do
Estado animou “a todas as empresas que estean a pensar en dar o
salto internacional a participar en ViaExterior, porque se abren
oportunidades nunha contorna cada vez máis competitivo”.
20
empresas
Do
total de candidaturas presentadas, seleccionaranse 20 empresas que
durante 7 meses recibirán formación e asesoramento personalizado a
través de tres fases: estratexia, aceleración e acceso a
financiamento. Estas tres etapas contemplan obradoiros presenciais
con enfoque práctico impartidos por expertos en mercados
internacionais, un campus de formación online con acceso 24
horas, un titor para realizar un plan de internacionalización
individualizado, adestramento (coaching), vixilancia
competitiva e un foro de financiamento e investimento ao concluír o
programa.
O
Consorcio da Zona Franca de Vigo desenvolverá dúas xornadas
informativas sobre ViaExterior V para explicar o programa ás
empresas interesadas e liquidar posíbeis dúbidas. A primeira sesión
será o luns 12 de setembro ás 9:30 horas a través de Zoom.
Posteriormente,
o xoves 15 de setembro, ás 12:00 horas, celebrarase un evento
informativo na sede da Asociación de Empresarios Polígono San
Cibrao, en Ourense, que contará coa presenza do delegado do Estado
no Consorcio da Zona Franca de Vigo (CZFV), David Regades.