Anuncian os xogos de balde que terán os usuarios de Xbox LIVE Gold en outubro

Darksiders II estará dispoñible en Games with Gold na segunda metade de outubro

Os usuarios de Xbox LIVE Gold van recibir no mes de outubro tres xogos sen custo adicional que parece que poden ser bastante ben recibidos e, aínda que o título para Xbox One sexa bastante modesto (trátase de Chariot, un título cooperativo de plataformas que se estrea na última consola de Microsoft a través desta promoción), para Xbox 360 os xogos que poderán descargarse de balde son bastante fortes, de xeito que na primeira metade do mes os usuarios poderán facerse con Battlefield Bad Company 2 (valorado en 19,99 euros) e, durante a segunda metade do mes, o xogo a descargar será Darksiders II (valorado en 64,99 euros).

Chariot é o xogo independente do que poderán gozar os usuarios de Xbox One a partires do mes de outubro

Cómpre destacar que, aínda que esteamos ante xogos dun prezo considerable, estes últimos son dos anos 2010 e 2012 respectivamente, polo que son bastante antigos, polo que un usuario que estivese interesado nos mesmos parece razoable que os tivese mercado hai tempo; pola contra, o xogo para Xbox One, pese a ser máis modesto, trátase dun desenvolvemento moi coidado da canadense Frima que podería satisfacer a moitos usuarios pola súa proposta clásica, á vez que incrementa a confianza do público nos títulos indie.

Trailer de lanzamento de Chariot