Angular 7 e o desenvolvemento avanzado de aplicacións, ao detalle nun novo curso de Vitae
mércores, 6 de febreiro do 2019
A
formación avanzada que obteñamos nun intre determinado non abonda
para sermos os mellores profesionais para a nosa empresa, por moito
que axude. Fan falta outros ingredientes fundamentais sen os cales a
capacitación deixa de ter a utilidade que debera ter. Estes
ingredientes son a nosa habilidade para traballar en equipo cunha
vontade constante de adestramento profesional e de actualización do
previamente aprendido. Axudarnos nestes puntos para sermos bos
xeradores de proxectos e, por suposto, bos compañeiros, é un dos
obxectivos da terceira edición do Curso
Angular 7: Desenvolvemento avanzado de aplicacións empresariais.
O
obradoiro, que ten 20 horas de duración, celébrase na Coruña
(Hotel Attica 21) os días 1, 2, 8 e 9 de marzo. O curso, sinala
Vitae, aborda o estudo das prácticas precisas para proxectos
empresariais: trátase dunha actividade formativa avanzada que aborda
un amplo abano de contidos de utilidade práctica: o deseño con
Material Design, o despregue empregando o renderizado do lado
do servidor ou a creación de Progressive Web Apps. Tamén se
porá o foco en xeitos de mellorar o rendemento a través de
estratexias de detección de cambios e o patrón Redux.
“Ao
remate do obradoiro”, explican os organizadores do mesmo, “o
alumnado será quen de crear aplicacións que aproveitan o mellor do
framework e o mellor da plataforma web”, dando forma a
proxectos cun aspecto e (tamén) cun comportamento máis depurado e
con alto rendemento. O curso vai dirixido principalmente a
programadores con experiencia en Angular. Terá, como dixemos, unha
duración de 20 horas.
O
formador será Alberto Basalo, enxeñeiro técnico en Informática
con dúas décadas de experiencia como analista programador, xefe de
proxectos e formador en pequenas e grandes empresas. Basalo é, a día
de hoxe, socio director de AgoraBinaria e consultor asociado a Vitae
Consultores.